Sumqayıt Dövlət Dram Teatrında yeni mövsümün başlanması ilə bağlı iclas keçirildi. Teatrın direktoru vəzifəsini icra edən Əməkdar artist Vidadi Məmmədov kollektivi salamladı, yeni mövsūmūn həm də sənət ocağının yubiley ilinə təsadūf etdiyini xatırladaraq yaradıcılıq palitrasının, repertuar siyasətinin daha da çeşidli və zəngin nəzərdə tutulduğunu bildirdi.
Natiq qeyd etdi ki, dövlətçilik sevgisi, vətən məhəbbəti aşılayan, tarixi şəxsiyyətlərimizə, 44 günlük müharibənin qəhrəmanlarına həsr olunmuş əsərlərə də xüsusi yer verməliyik. Məhz belə tamaşalarla teatr özünün üzərinə düşən maarifçilik funksiyasını yerinə yetirə bilər.
Teatrın baş rejissoru, respublikanın Xalq artisti Firudin Məhərrəmov 55- ci yubiley mövsümündə də maraqlı tamaşaların və yubiley tədbirlərinin planlaşdlrıldığını söylədi.
Çıxışlarda uşaq tamaşalarına tələbatın çox olduğu diqqətə çatdırıldı. "Qaraca qız", "Tıq-tık xanım", "Göyçək Fatma", "Danışan gəlincik" kimi tamaşalar balacalar tərəfindən xüsusi maraqla qarşılanıb. Əlbəttə , birinci növbədə uşaqların psixologiyasını, arzu və istəklərini öyrənmək vacibdi.
Ötən mövsümdən məşqləri başlanılan Ü. Hacıbəyov "O olmasın , bu olsun" (quruluşçu rejissor- Əməkdar artist Namis Şirməmmədov) və Ə.Haqverdiyev "Kimdir müqəssir" ( quruluşçu rejissor- Fuad Kazımov) yaxin günlərdə təhvil veriləcək. Məşqlərinə başlanılan səhnə əsərlərindən daha biri A.Linqren "Balaca və Karlosonun macəraları" rejissor Vasif Məmmədovun quruluşunda təhvil veriləcək.
Qürur məqamımız olan Zəfər günü ilə bağlı Hafiz Ataxanlının qələmə aldığı, Xalq artisti F.Məhərrəmovun quruluş verdiyi " Missiya" tamaşasi Şəhid ailələri və Qazilər üçün xüsusi olaraq oynanılacaq.
Ulu öndər Heydər Əliyevin 100, Azərbaycan teatrının 150, Sumqayıt teatrının 55, dahi mütəfəkkir Hüseyn Cavidin 145, Əhməd Cavadın 130 illik yubileyləri üçün tamaşa və ya ədəbi- bədii gecələrin hazırlanması da yaradıcılıq planları içərisində önəmli yer tutur.
Sonda baş rejissor F.Məhərrəmov teatrda daxili imkanlar hesabına kitabxana yaradıldığını bildirdi və hər kəsi bu təşəbbüsə qoşulmağa çağırdı.
Xəbərdən istifadə edərkən istinad etmək vacibdir.
