Sumqayıt Regional Mədəniyyət İdarəsinə tabeli Sumqayıt şəhər Heydər Əliyev Mərkəzində peşəkar rəssam Azərbaycan Rəssamlar İttifaqının üzvü Elçin Qasımovun 55 illiyinə həsr edilən "Rənglərin sirri" adlı ilk fərdi sərgisi təşkil olunub. Sumqayıt Dövlət Rəsm Qalereyası və Şəhər Mədəniyyət evinin birgə təşkilatçılığı ilə keçirilən sərgidə rəssamın 30-yaxın əsəri nümayiş olunub. Tədbirdə Əməkdar incəsənət xadimi, sənətşünaslıq üzrə fəlsəfə doktoru, Azərbaycan Rəssamlar İttifaqının "Tənqid və sənətşünaslıq" bölməsinin sədri, "Sənətşünaslığın təbliği" İctimai Birliyinin sədri, professor Ziyadxan Əliyev, Sumqayıt Regional Mədəniyyət İdarəsinin rəisi Rəşad Əliyev, Azərbaycan Yazıçılar Birliyinin Sumqayıt bölməsinin sədri şairə Gülnarə Cəmaləddin, rəssamlar, müəssisə və təşkilat rəhbərləri, ziyalılar və KİV nümayəndələri iştirak ediblər. Qeyd edək ki, Elçin Vilayət oğlu Qasımov 1 avqust 1967-ci ildə Gədəbəy rayonunun Kiçik Qaramurad kəndində anadan olub. Sumqayıt şəhər 24 saylı orta məktəbdə oxuyub. İlk peşəkar təhsilini Ə.Hüseynzadə adına Mədəniyyət və İncəsənət Universitetinin qrafik-rəssam ixtisası üzrə alıb. Rəngkarlık və qrafika üslubunda işləyən rəssamın əsərləri İncəsənət Muzeyində və bir çox xarici ölkələrdəki şəxsi kolleksiyalarda saxlanılır. Çıxış edən Sumqayıt Regional Mədəniyyət İdarəsinin rəisi Rəşad Əliyev son iki ildə mədəniyyət sferasındakı canlanmadan məmnun qaldığını bildirib, yaradıcı insanları tanıtmağın bu qəbildən olan sərgilərin keçirilməsinin vacibliyini vurğulayıb. İdarə rəisi rəssam Elçin Qasımovun əsərlərindəki Abşeron kolaritindən və rənglərin harmoniyasından danışıb, rəssama yaradıcılıq uğurları arzu edərək ona idarənin Fəxri Fərmanını təqdim edib. Sənətşünas Ziyadxan Əliyev ilk növbədə əsərlərin milli köklər üzərində doğma rənglərdə yaranmasından və rəssamın əsərlərinə yüksək dəyər verdiyini qeyd edib. Rəssamın iş metodu, mövzu və rəng seçimi, kölgə elementlərinin doğru proyeksiyası barədə maraqlı fikirlər söyləyib.
Sonda Şəhər Mədəniyyət evi və Qara Qarayev adına Musiqi Məktəbinin kollektivi musiqi nömrələri ilə çıxış ediblər.
Xəbərdən istifadə edərkən istinad etmək vacibdir.
