Sumqayıt Regional Mədəniyyət İdarəsinə tabeli Sumqayıt Bülbül adına 2 nömrəli Uşaq İncəsənət Məktəbində Azərbaycan vokal məktəbinin banisi dahi Bülbülün 125 illiyinə həsr olunan tədbir keçirilib. Əvvəlcə tədbiri giriş sözü ilə çıxış edən Sumqayıt Regional Mədəniyyət İdarəsinin rəisi Rəşad Əliyev açıq elan edib. Tədbir dahi sənətkarın repertuarından olan A.Zeynallının "Ölkəm" romansı ilə başlayıb. Romansı məktəbin vokal müəllimi Xatirə Hacıyeva ifa edib. Sonra dahi Bülbülün həyat və yaradıcılığı haqqında tamaşaçılara məlumat verilib və İlham Həsənovun məktəbin Xalq çalğı alətləri orkestrın müşayiəti ilə Ziya Mikayılov ifasında "Gülə-gülə” xalq mahnısı və Zəhra Baxşıyevanın ifasında Ş.Axundovanın "Mehriban olaq" mahnısı tamaşaçılara təqdim olunub. Ardınca məktəbin fəal şagirdlərinin ifasında dahi sənətkarın repertuarından bir-birindən rəngarəng əsərlər səsləndirilib. Həmin əsərlər arasında dahi bəstəkar Ü.Hacıbəyovun "Sevgili canan", "Sənsiz” romansları, F.Əmirovun "Bulaq başında" mahnısı, "Min bir gecə" baletindən Mərcanın rəqsi, məktəbin məzunu olan, VIII "Muğam” Televiziya Müsabiqəsində II yerə layiq görülən Aynur Həsənxanova "Qara tellər" xalq mahnısı, məktəbin şagirdi Nuray Şahsuvarlının ifasında "Kəsmə-şikəstə" zərbi-muğamı tamaşaçıların böyük rəğbətini qazanıb. Tədbirdə məktəbin "Ümid” rəqs kollektivi, "Şəfəq" uşaq xoru və müəllimlərdən ibarət "Humay" xoru öz ifalarını nümayiş etdiriblər. Sonda qonaqlar ilə birgə xatirə fotoları çəkilib.
Xəbərdən istifadə edərkən istinad etmək vacibdir.
