Azərbaycanda yol hərəkəti qaydaları demək olar ki, hər addımda pozulur. Qayda pozuntuları həm piyadalar, həm də sürücülər tərəfindən qeydə alınır. Xüsusilə də Sumqayıtda bu sahədə vəziyyət acınacaqlıdır. Piyadaların yol hərəkəti qaydalarını mütəmadi olaraq pozması adi hal alsa da, buna müdaxilə, ciddi təsir mexanizmləri demək olar ki, yoxdur. Düzdür, sürücülərin də səhlənkarlığı yetərincədir. Bunu inkar etmək mümkün deyil. Bilərəkdən, yaxud bilməzlikdən sükan arxasında oturan şəxs yol hərəkəti qaydalarını kobud şəkildə pozur.

Bəzi yolları piyadalar üçün sözün həqiqi mənasında ölümə aparan yol adlandırmaq olar.

Yerüstü piyada keçidləri olmadığından piyadalar keçid zolaqlarından istifadə edirlər. Sürücülərin zülmət qaranlıqda piyada keçidini görməsi isə mümkünsüzdür. Bu səbəbdən sürətlə gələn avtomobillərin piyadaları vurma ehtimalı artır. Yəni bəzi yollarda ölüm gözlə qaş arasındadır.

Elə Xeberle.com-un sosial şəbəkə hesablarında Sumqayıt sakinləri arasında keçirdiyi sorğu da bunu deməyə əsas verir. Bu dəfə "Facebook" və "İnstagram" sosial şəbəkələrində respondentlərə "Sumqayıtda hansı yolu ölüm yolu adlandırmaq olar?" sualını ünvanladıq.

Sorğuda iştrak edən 210 respondentdən əksəriyyəti Babək küçəsində yerləşən "Hiper” marketin qarşısındakı yolun daha təhlükəli olduğunu qeyd ediblər.

 

 

Siralamada sonrakı pillələrdə təhlükəlilik dərəcələrinə görə 18- ci mikrorayon dairəsi, 9 və 11-ci mikrorayonları arasında yerləşən yol, Bakı-Sumqayıt yolu, köhnə yarmarka yolu(12-ci mkr) yer alır.

Xədicə Səxavətqızı

Xeberle.com

 

Xəbərdən istifadə edərkən istinad etmək vacibdir.