Yeni dərs ilinin başlanmasına 10 gün qalıb. Elə bu məqsədlə də Sumqayıtın müxtəlif ərazilərində məktəbli yarmarkaları təşkil olunub. Övladlarını məktəbə yola salmağa hazırlaşan valideynlər də vaxt itirmədən məktəbli ləvazimatlarını almaq üçün yarmarkalara axın edirlər. Onların bu tələskənliyinin səbəbi isə məktəb başlayana yaxın qiymətlərin daha da bahalaşması ehtimalı ilə bağlıdır.
Qeyd edək ki, bir neçə gündür, şəhərin müxtəlif mərkəzi yerlərində müvafiq çadırlar qurularaq məktəb ləvazimatları satılır. Sentyabrın 25-nə kimi davam edəcək yarmarka çadırlarında məktəbli üçün lazım olan bütün ləvazimatlar satılır.
Sözügedən yarmarkalardakı qiymətlərlə yaxından tanış olmaq üçün Sumqayıtın mərkəzində təşkil olunan yarmarkalardan birinə baş çəkib qiymətlərlə maraqlandıq. Məlumat üçün bildirək ki, valideynlər digər dərs vəsaitləri ilə müqayisədə məktəbli çantalarının qiymətində bahalaşma müşahidə edildiyindən gileyləndilər. Belə ki, yarmarkada aşağı sinif şagirdləri üçün nəzərdə tutulan çantaların qiyməti 25-50 AZN, yuxarı siniflər üçün isə 30-170 AZN təşkil edirdi.
Türkiyə istehsal olan 100 vərəqli dəftər 0,70-0, 90 qəpikdən satılır. Rusiya istehsalı olan, daha keyfiyyətli dəftərlərin qiyməti isə nisbətən bahadır. Yapışdırıcı 60 qəpik-1 manat, pozanlar 1,20-2,50 manat, qələm yonanlar 1.50-2 manat, rəsm albomları 0.90-3 manat, qələmlər 0.10-3.90 manat, rəngli karandaş dəstlərinin qiyməti isə 5 -18 manat təşkil edir.
Məktəbli formaları üçün də standart qiymət yoxdur. Bakı Tikiş Fabrikinin istehsalı olan pencək, yubka və ya şalvarla olan dəstlər 40-45 manat, məktəbli köynəkləri 13-19 manat məbləğindədir.
Bütün yarmarkalarda qiymətlər demək olar ki, eynidir. Beləliklə, Xeberle.com-un hesablamasına əsasən, bir uşağı dərsə yola salmaq valideynə 150-200 manata başa gəlir.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
