Ötən gündən sosial şəbəkələrdə Sumqayıt şəhərinin helikopterlər vasitəsi ilə
dezineksiya ediləcəyi ilə bağlı səs yazısı və məlumat yayılıb. Yayılan məlumatda
o da bildirilir ki, bu gün gecə saatlarında Sumqayıt şəhəri helikopterlər vasitəsi ilə
havadan dezinfeksiya ediləcək. Hətta əhaliyə zivələrdə paltar asmamamaları və
çölə çıxmamaları da tövsiyyə olunur.
Xeberle.com yayılan məlumatla bağlı araşdırma aparılıb.
Məsələ ilə bağlı Sumqayıt Şəhər İcra Hakimiyyətinin mətbuat katibi Eyvaz Qocayevlə əlaqə saxladıq. Onun sözlərinə görə, şəhər ərazisində yerləşən inzaibati binalar, məktəb və ali təhsil müəssisələri, xəstəxanalar mütəmadi şəkildə dezinfeksiya edilir:
"Şəhərin gecə saatlarında helikopterlər vasitəsilə havadan dezinfeksiya ediləcəyinə dair məlumatlar həqiqəti əks etdirmir. Koronavirus (COVID-19) təhlükəsi ilə əlaqədar məktəblərin, bağçaların və yaşayış binalarında dezinfeksiyası işləri aparılır. Şəhərin bütün təhsil və səhiyyə binaları, idarə və müəssisələr, məscidlər, ictimai nəqliyyat vasitələri, binaların blokları dezinfeksiya olunub.
Müntəzəm marşrut xətləri üzrə hərəkət edən avtobuslar hər günün sonunda dezinfeksiya edilir. İnsanlar gigiyenik normalara hər zamankından daha çox diqqət etməlidir. İnsanların sıx toplaşdığı məkanlara getmək tövsiyə edilmir”.
Məlumat üçün bildirək ki, havanın dezinfeksiya edilməsinin
heç bir əhəmiyyəti yoxdur. Sadəcə insanlarla yaxın təmaslardan qorunmaq və gigiyenik qaydalara əməl etmək lazımdır.
Xədicə Səxavətqızı
Xəbərdən istifadə edərkən istinad etmək vacibdir.
