Aprelin 7-si Ümumdünya Sağlamlıq Günüdür
1948-ci il aprelin 7-də Ümumdünya Səhiyyə Təşkilatının yaranması Ümumdünya Sağlamlıq Günü kimi qeyd edilir. 1950-ci ildən bəri dünyanın 194 ölkəsi, o cümlədən Azərbaycan bu təşkilata üzv qəbul olunub.
Əlbəttə ki, səhiyyə hər bir ölkə üçün vacib sahələrdəndir. Respublikamızda, eyni zamanda şəhərimizdə vətəndaşların sağlamlığının qorunması istiqamətində məqsədyönlü işlər görülüb. Həyata keçirilən islahatlar nəticəsində nümunəvi tibb müəssisələri formalaşdırılıb.
Ümumdünya Sağlamlıq Günü ərəfəsində Sumqayıt Tibb Mərkəzinin tabeliyində olan 1 saylı Ailə Sağlamlıq Mərkəzinin baş həkimi Təranə Mənsurova ilə görüşüb ona bir neçə sualla müraciət etdik.
Hər şey işin təşkilindən asılıdır
- Təranə xanım, əvvəlcə Ümumdünya Səhiyyə Təşkilatının (ÜST) prioritet istiqamətləri barədə oxucularımıza məlumat verməyiniz yerinə düşərdi.
- ÜST-nın məqsədləri sırasına sağlamlıq qaydalarına düzgün əməl edilməsi, səhiyyə məsələlərinin həllində dövlət orqanlarına köməklik göstərilməsi, həkimlərin peşəkarlığının artırılması, düzgün qidalanma, idman və normal həyat tərzinin təbliği və s. kimi məsələlər daxildir. Bir sözlə, həmin gün səhiyyənin problemlərinə yönələn və planetin hər bir sakininin sağlamlığının qorunması üçün birgə fəaliyyət göstərməyə xidmət edən tədbirdir.
Onu da xatırladım ki, 2021-ci ildə Ümumdünya Sağlamlıq Günü yeni növ koronovirus (COVİD-19) pandemiyasının yayılması ilə mübarizə mövzusuna həsr edilmişdir və "Daha ədalətli və daha sağlam dünya quraq", ötən il isə "Bizim planetimiz bizim sağlamlığımızdır" şüarları ilə keçirilmişdir. Tibb xidmətlərinin əhatə dairəsinin genişləndirilməsi, xəstəliklərin düzgün müalicəsinin aparılması 2030-cu ilə qədər qarşıda duran əsas məsələlərdən biridir.
- Bəs bu ümdə vəzifəni kollektiviniz necə həyata keçirir?
- Bəri başdan deyim ki, ölkəmizdə səhiyyənin inkişafı və tərəqqisi dahi şəxsiyyət Heydər Əliyevin adı ilə bağlıdır. Bu gün Prezident İlham Əliyevin ulu öndərin müəyyənləşdirdiyi yolu müasir tələblər səviyyəsində uğurla davam etdirməsi səhiyyə sisteminin də inkişafına təkan verib. Qəbul olunmuş dövlət proqramlarının icrası, aparılan islahatların reallığa çevrilməsi əhaliyə göstərilən tibbi xidmətin səviyyəsinin yüksəldilməsinə, xəstələrin dərmanla təchizatının əhəmiyyətli dərəcədə yaxşılaşmasına imkan verib.
- Adətən insanlar özlərində nasazlıqlar hiss edəndə ümidlə səhiyyə ocaqlarına, həkimlərə üz tuturlar. Bəs bu ümidləri necə doğruldursunuz?
- Bildiyiniz kimi, səhiyyə sahəsində aparılan islahatlar çərçivəsində formalaşmış İcbari Tibbi Sığorta üzrə Dövlət Agentliyi tərəfindən Sumqayıt şəhər Səhiyyə Şöbəsinin bazasında yeddi Ailə Sağlamlıq Mərkəzi və dörd şəhər xəstəxanası olmaqla 18 tibb müəssisəsindən ibarət Sumqayıt Tibb Mərkəzi yaradılmışdır. 9-cu mikrorayon ərazisində yerləşən 1 saylı Ailə Sağlamlıq Mərkəzi 9, 10, 12, 17, 18-ci mikrorayonların, 47, 48 və 49-cu məhəllələrin, Yaşıldərə yaşayış massivinin bir hissəsinin sakinlərinə tibbi xidmət göstərir. Qeydiyyatımızda 75 min böyük, 24 min 500 uşaq əhali qrupu vardır. Onların sağlamlığı keşiyində 233 nəfər tibb heyəti dayanıb. Burada ixtisaslı pediatrlar, terapevtlər, ginekoloqlar, loqoped və psixoloqlar çalışır. Həkimlərimiz tərəfindən müayinə və müalicələr aparılır, diaqnozlar qoyulur. Yeni strukturda fəaliyyət göstərməyimizin üstünlükləri çoxdur. Vətəndaşlarımız vaxt itirmədən tibb müəssisələrinə müraciət edib rahat şəkildə xidmətlərimizdən yararlana bilirlər. İslahatlar nəticəsində həm tibb xidmətlərinin keyfiyyəti artıb, həm də onun əhali üçün əlçatanlığı təmin olunub. Bir sözlə, 2021-ci ilin aprelin 1-dən tətbiqinə başlanan icbari tibbi sığortanın xidmətlər zərfi nəticəsində əhaliyə tibbi xidmətlər göstərilir.
- Yeniliklər yaxşıdır, ürəkaçandır. Razılaşaq ki, peşəkar həkim olmadan insanlara nümunəvi xidmətin göstərilməsi mümkün deyil...
- Əlbəttə, yaxşı tibbi xidmət üçün yaxşı mütəxəssis olmalıdır. Mərkəzimiz kadr potensialı olan səhiyyə ocaqlarındandır. Sumqayıt Tibb Mərkəzinin dəstəyi ilə cədvəl üzrə seminarlar təşkil olunur və tibb xidmətinin keyfiyyətinin yüksəldilməsi ilə bağlı məsələlər müzakirə edilir.
Əhali arasında sanitar-maarifləndirmə işlərini gücləndirmişik. Hamilə qadınlarımızın sağlamlıq durumu diqqətdə saxlanılır. Həkim-ginekoloqlarımız tərəfindən yerlərdə onlara yüksəkixtisaslı səhiyyə xidmətləri göstərilir. Ümumtəhsil məktəbləri və uşaq tərbiyə müəssisələri ilə də əlaqələrimiz möhkəmləndirilmişdir. Hər bir məktəb və uşaq bağçasında tibb heyəti fəaliyyət göstərir.
Peşəkar həkim-mütəxəssislərimiz də az deyil. Terapevtlər Zülfiyyə Bəkirova, Vüsalə Cavadzadə, pediatrlar Şəbnəm Səlimova, Kəbirə Həsənova, ginekoloq Sevinc Şükürova, psixoloq Sevinc Əsədova, laqoped, Şəlalə Tərlanova və başqaları yaxşı işləri ilə əhalinin hörmətini qazanmışdır.
- Fəaliyyətinizlə bağlı daha hansı yeniliklər var?
- Uşaqlar üçün psixi sağlamlıq mərkəzi açmışıq. Axı, uşaqlar qloballaşan dünyamızın ən həssas təbəqəsi sayılır. Təcrübəli psixoloq və laqopedlərin köməyi ilə uşaq və yeniyetmələrin cəmiyyətə inteqrasiyası və fiziki inkişafı üçün lazımi tibbi müayinələr aparılır. Uşaqların peyvənd olunmasına xüsusi diqqət yetirilir. Mövsümi xəstəliklərlə əlaqədar profilaktiki və sanitar-maarifləndirici işlər həyata keçirilir. Eyni zamanda böyüklər arasında "COVİD-19" əleyhinə peyvəndlənmə işləri davam etdirilir.
Bundan sonra da əhaliyə keyfiyyətlə tibbi xidmət göstərilməsi üçün əlimizdən gələni əsirgəməyəcəyik.
Müsahibəni apardı:
Sübhan QULİYEV
"Sumqayıt" qəzeti
Xəbərdən istifadə edərkən istinad etmək vacibdir.
