Ümumdünya Səhiyyə Təşkilatı (ÜST) dünyada tütün istehlakının azaldığını açıqlayıb.
Xeberle.com məlumat verir ki, bu barədə ÜST-nin saytında dərc edilmiş hesabatda qeyd olunub.
2022-ci ildə, ÜST-nin hesablamalarına görə, dünyada təxminən 1,25 milyard insan və ya planetin hər beş "böyüyündən" biri tütündən istifadə edib. 2000-ci ildə 1,36 milyard insan və ya planetin hər üçüncü adamı tütün istehlak edib.
Bildirilib ki, 2000-ci ildə dünya üzrə kişilərin 49,1%-i və qadınların 16,3%-i bu və ya digər formada tütündən istifadə edib. O vaxtdan tütün sənayesinin inkişafına baxmayaraq, dünya əhalisi arasında tütündən istifadə azalmağa başlayıb. ÜST-ün proqnozlarına görə, tütün asılılığı ilə mübarizə tədbirlərinin intensivliyi davam edərsə, onun yayılması 2025-ci ildə 32,9%-ə, 2030-cu ilə qədər isə 30,6%-ə qədər azalacaq.
Hesabata görə, 2022-ci ildə tütündən istifadə edən əhalinin ən yüksək nisbəti Cənub-Şərqi Asiya regionunda qeydə alınıb - 26,5%. Avropa regionunda insanların 25,3%-i tütündən istifadə edib və burada qadınlar arasında tütündən istifadə səviyyəsi dünya üzrə orta göstəricidən iki dəfə çox olub.
2022-ci ilin sonuna qədər 150 ölkədə tütündən istifadənin yayılması azalıb. Bununla belə, Konqo, Misir, İndoneziya, İordaniya, Oman və Moldova kimi ölkələrdə tütün istehlakı nisbətləri hələ də artmaqdadır.
Xəbərdən istifadə edərkən istinad etmək vacibdir.
