Bir vaxtlar adı "qara siyahı"da olan şəhər qara günlərini arxada qoyub...
Bu gün cəmiyyətimizi ən çox narahat edən məsələlərdən biri də ətraf mühitin qorunması, ekoloji problemlər və xüsusilə insanları təhdid edən gigiyenik tarazlığın pozulmasıdır. Müasir dövrdə az qala hər gün yeni adda və tərkibdə qida məhsullarının istehsalı, bir sıra infeksiyaların yayılması cəmiyyətin epidemioloji və gigiyenik təhlükəsizliyinin daim diqqətdə saxlanılmasını tələb edir.
Sumqayıt şəhəri də hələ sovet dövründən Azərbaycanda ekoloji tarazlığın ən çox pozulduğu məkan kimi tanınıb. Bəs görəsən vaxtı ilə "ölü şəhər” adlandırılan Sumqayıtda bu sahədə durum indi necədir?
Beləliklə suallarımızı Sumqayıt şəhər Gigiyena və Epidemiologiya Mərkəzinin direktoru Rafiq Abdullayev cavablandırır:
- Rafiq müəllim, bu gün sanitar-epidemioloji sahənin faəliyyəti hansı qanunvericilik əsasında qurulur? Fəaliyyətinizin əsas istiqamətləri barədə məlumat verməyinizi xahiş edirəm.
- Sumqayıt şəhər Gigiyena və Epidemiologiya Mərkəzi "Sanitar Epidemioloji Salamatlıq haqqında”, "Əhalinin Sağlamlığının qorunması haqqında” – Azərbaycan Respublikası Qanunlarına, Nazirlər kabinetinin müvafiq qərarlarına , Səhiyyə Nazirliyinin ayrı-ayrı əmr və təlimatlarına , Şəhər İcra Hakimiyyəti başçısının sərəncamlarına və respublikanın digər qanunvericilik aktlarına istinad edərək öz işini qurur. Gigiyena və Epidemiologiya Mərkəzinin əsas fəaliyyət istiqaməti şəhər əhalisinin ümumi sağlamlığının qorunması , bu sağlamlığa mənfi təsir göstərə bilən ətraf mühit amillərinin aradan qaldırılması üçün qabaqcadan kompleks profilaktik tədbirlərin hazırlanmasından ibarətdir. Bunun üçün ayrı-ayrı idarə, müəssisə, təşkilat və özəl sahibkarlıq subyektlərinin rəhbərləri ilə birlikdə qabaqcadan sanitar sağlamlaşdırıcı tədbirlər planı hazırlanır, Təsdiq edilir və bunların vaxtında yerinə yetirilməsinə Dövlət Sanitariya Nəzarəti aparılır.
- Sumqayıt şəhərində yoluxucu xəstəliklərin qarşısının alınması sahəsində nə kimi tədbirlər görülür?
- Şəhər əhalisi arasında yoluxucu xəstəliklərin baş verməməsi və yayılmaması üçün idarə və müəssisə rəhbərləri ilə xüsusən şəhər Səhiyyə şöbəsi ilə birlikdə xüsusi təhlükəli yoluxucu xəstəliklərə qarşı kompleks profilaktik tədbirlər planı hazırlanır və Şəhər İcra Hakimiyyəti yanında Fövqaladə hallar Komissiyası tərəfindən təsdiq edilir, il ərzində nəzərdə tutulan tədbirlərin yerinə yetirilməsinə nəzarət edilir. Şəhər Səhiyyə şöbəsi ilə birlikdə ayrı-ayrı yoluxucu xəstəliklərə qarşı profilaktik peyvənd planı hazırlanır və yerinə yetirilməsinə nəzarət edilir.
- Ümumiyyətlə, bu gün şəhərdə yoluxucu xəstəliklərin yayılması hansı səviyyədədir? Bu tipli xəstəliklərə rast gəlinirmi?
- Qeyd edim ki, görülən kompleks sanitar sağlamlaşdırıcı tədbirlər planının, yoluxucu xəstəliklərə qarşı peyvənd planının və digər profilaktik tədbirlərin düzgün və vaxtında yerinə yetirilməsinin nəticəsidir ki, son illər ərzində şəhər əhalisi arasında bir çox yoluxucu xəstəliklər (taun, tulyaremiya, vəba və s.) rast gəlinmir, bəzi xəstəliklər (qarayara, quduzluq , malyariya və s.) isə nadir hallarda baş verir və bunların yayılmasının qarşısı vaxtında alınır.
- Tədris müəssisələrində, xüsusilə uşaq bağçalarındakı sanitar-epidomioloji vəziyyətdən mütamadi narazılıqlar səsləndirilir. Bu sahədə Sumqayıt şəhərində hansı qabaqlayıcı tədbirlər görülür?
- Respublika rəhbərliyinin, şəhər İcra hakimiyyətinin qayğısı və köməkliyinin nəticəsində son illər ərzində şəhər ərazisində yerləşən uşaq və yeniyetmə müəssisələrində, məktəbəqədər uşaq müəssisələrində ümumi təmir və abadlıq işləri daha intensiv aparılır. Belə ki, son illər ərzində əksəriyyət məktəbəqədər uşaq müəssisələrində əsaslı təmir işləri aparılmışdır. İl ərzində bu müəssisələrdə cari və hissəvi təmir işləri aparılır, abadlıq işləri görülür. Uşaqlar arasında vaxtlı – vaxtında peyvəndləmə tədbirləri aparılır, digər sanitar sağlamlaşdırıcı tədbirlər görülür. Ümumilikdə məktəbəqədər uşaq müəssisələrində (uşaq bağçalrında) sanitar-gigiyenik və epidemioloji vəziyyət qənaətbəxşdir. Əhalinin sayının artmasına baxmayaraq son 25 il ərzində məktəbəqədər uşaq müəssisələri tikilmədiyindən uşaqların qəbulunda, yerləşdirilməsində, qidalanmasının təşkilində çətinliklər var.
- Sumqayıt çimərliyindəki anti-sanitar vəziyyətin ağırlığı, çirkab suların dənizə axıdılması hər kəsə məlumdur. Onun aradan qaldırılması üçün sizin idarə öz sahəsində hansı işləri görür?
- Nəzərinizə çatdırım ki, sənayenin və məişətin çirkab sularının bir qismi Üzvi Sintez İstehsalat birliyinin nəzdində olan təmizləyici qurğular sexində, məişət tullantıları sularının bir qismi Maralgölü ətrafı ərazidə olan təmizləyici qurğular sexində təmizləndikdən sonra dənizə axıdılır. Bununla belə müəyyən qism məişətin çikab suları təmizlənmədən şəhərin bir neçə yerində dənizə axıdılır. Uzun illərdir ki, mövsüm qabağı və mövsüm dövründə aparılan müayinələr nəticəsində dəniz suyunun bakterioloji və kimyəvi çirklənməsi müşahidə edilir. Buna görə də 1991-ci ildə çıxarılmış 9 saylı qərar hər il qüvvədə saxlanılır, H.Z.Tağıyev qəsəbəsi ilə Corataltı sahə ərazisində əhalinin dənizdə çimməsi qadağan edilir və bu barədə KİV-rə (xüsusən"Dünya” TV-yə, "Sumqayıt” qəzetinə), Şəhər İcra Hakimiyyətinə, Şəhər MKTİİB-nə, Şəhər Polis İdarəsinə məlumat verilir. Novxanı ərazisində olan özəl çimərlik sahələrində şambolar tikildiyindən, lokal dezinfeksiyaedici qurğulardan istifadə edildiyindən bu ərazidə bakterioloji və kimyəvi çirklənmə nisbətən qənaətbəxş səviyyədədir. Dənizə sənayenin və məişətin çirkab sularının axıdılmaması üçün, təmizləmə və dezinfeksiya tədbirlərinin aparılması üçün yeni sutəmizləyici qurğular sexinin gücünün artırılması nəzərdə tutulur.(moderator.az)
Xəbərdən istifadə edərkən istinad etmək vacibdir.
