Qaraciyər insan orqanizmində ən böyük orqandır. Bu orqan 500-dən çox funksiyanı yerinə yetirir. Qaraciyər özünü bərpa edən orqandır və regenerasiya (özünü bərpa) xüsusiyyəti çox güclüdür. Hepatit qaraciyərin iltihabı prosesidir. Bu iltihabı törədən faktorlar çoxdur. Bu xəstəlik yanlış qidalanma, alkoqol və enerji içkilərinin qəbulu, nəzarətsiz dərman qəbulu, virusla yoluxma zamanı yarana bilər. Hazırda daha çox aktual olan virus hepatitləri B, C, D-dir.
Bu sözləri hepatitin yoluxma yollarından və əlamətlərindən danışan hepatoloq Nuranə Quliyeva deyib. O bildirib ki, hepatit hüceyrə səviyyəsində gedən prosesdir, müalicəyə çətin tabe olur:
"Hepatitlərin müalicəsi mürəkkəb prosesdir. Hepatitin müalicəsindən sonra qalan fəsadlar da ağır olur: qaraciyər serrozu və xərçəngi ilə nəticələnə bilər. Hepatitin özünü büruzə verməyinə gəlincə, bu xəstəliyin bəzən heç bir əlaməti olmaya bilər. 80-90 faiz hallarda xronikiləşir. Virus bədənə daxil olduqdan fəsad törətdiyi ana qədər heç bir əlamət, şikayət verməyə bilər, yəni xəstə özünü sağlam hiss edir. Ancaq təsadüfi müayinə zamanı hamilələrin qeydiyyatında, əməliyyat öncəsi aparılan çek-aplarda aşkarlana bilər. Hepatitin ümumi əlamətləri var ki, bu da halsızlıq, yorğunluq, sidiyin rənginin tündləşməsi, nəcisin rənginin ağ olması, gözün ağ qişasında sarılıqdır”.
Hepatit C-dən qorunmaq üçün peyvənd olmasa da, ondan qorunmaq yolları var. Bu virus 90% ehtimalla qan və cinsi əlaqə ilə yoluxa bilər. Şəkərli diabet və immuniteti zəif olan şəxslərin hepatitə yoluxma ehtimalı çoxdur. Hepatit B və D sürətli olaraq qaraciyər xərçənginə gətirib çıxara bilir. Bunların yoluxma ehtimalı isə çoxdur. Ağız suyu, adi tər vasitəsilə və ya görüşən zamanı belə bu virusa yoluxma halı baş verə bilər. Buna görə ailədə bir üzv bu virusa yoluxubsa, digər ailə üzvləri mütləq peyvənd olunmalıdır”.(Axar.az)

Xəbərdən istifadə edərkən istinad etmək vacibdir.