Dünyanın ən məsum varlıqları olan uşaqların müayinə və müalicəsi
ilə məşğul olan bir çox uşaq xəstəxanası var. Bunlardan biri də elə Sumqayıt şəhər
Uşaq Xəstəxanasıdır. Son illərdə daha çox inkişaf edən xəstəxanaya yeni
avadanlıqlar gətirilib.
Xeberle.com-a açıqlama verən Sumqayıt şəhər Uşaq Xəstəxanasının
baş həkimi Müşfiq Məmmədli bildirib ki, 2016-cı ilin sentyabrından başlayaraq xəstəxanaya
şəhər rəhbərliyinin diqqəti, qayğısı, tələbi və səhiyyə şöbəsinin köməkliyi ilə
geniş yenidənqurma işləri, səhiyyə xidmətinin yaxşılaşdırılması istiqamətində
addımlar atılmağa başlayıb.
Uşaq Xəstəxanasında böyük problem olan mərkəzləşmiş oksigen
sisteminin qurulmasına başlanıldı
M. Məmmədli bildirdi ki, 2016-2017-ci illər ərzində infeksion
korpus yenidən qurulub. Tibbi xidmətin
keyfiyyəti yaxşılaşdırılıb və bu da xəstəxanada əhaliyə göstərilən xidmətə öz
müsbət təsirini göstərib: "Ancaq
biz bu görülən işlərlə kifayətlənmədik və bizə şəhərdə gedən abadlıq işlərinin
bir hissəsi kimi bu sahəyə rəhbərlik edən şəxslərin və birbaşa İcra Hakimiyyətinin
başçısı Zakir Fərəcovun köməkliyi ilə Uşaq Xəstəxanasında yenidənqurma işləri
ardıcıllıqla aparılmağa başladı. Uzun
illərdən bəri xəstəxanada problemə çevrilmiş mərkəzləşmiş oksigen sistemi
problemi artıq öz həllini tapıb. Belə ki,
bu ildən mərkəzləşmiş oksigen sisteminin qurulmasına start verildi. Belə ki, bu bölmə 3 hissədən təşkil olunub.
İnfeksion xəstələr üçün nəzərdə tutulmuş reanimasiyanın təchizatı, somatik xəstəliklər
və pediatriya şöbəsi üçün nəzərdə tutulmuş 1 bölmə və cərrahiyyə xəstəliklər
üçün 3 bölmədən ibarət olan mərkəzləşmiş oksigen sistemi quruldu. Bu təchizat
sisteminin üstünlüyü ondan ibarətdir ki, bir anda bütün xəstəxana oksigen, hava
və vakum sistemi ilə təmin olunur. Çox qısa müddət ərzində bu işlərə başlanıldı
və demək olar ki, işlərin 70 %-i görülüb.
Hal-hazırda isə kosmetik dizayn işləri qalıb. Mərkəzləşmiş
kompressorlar, oksigenin yayılması üçün xətlər test şəklində sızıntıya, təhlükəsizliyə
qarşı yoxlanılıb. Və cərrahiyyə bloku və
pediatriya bölməsi tamamilə oksigenlə təmin olunub."
Daha bir həllini tapmayan məsələ həll edildi
Baş həkim həmçinin
vurğulayıb ki, xəstəxanada yeniliklər bununla yekunlaşmayıb. Onu sözlərinə görə, yeni müasir qan
analizatorları ilə xəstəxananın təmin olunması
məsələsi də yaxın müddət ərzində həll edildi: "Bütün bu
avadanlıqlar qısa müddət ərzində alındı. İşi asanlaşdırmaq və sürətləndirməkdən
ötrü ayrıca qan alma bölməsi və diaqnostik laboratoriya ümumi laboratoriya bölməsindən
müstəqil şəkildə quruldu və fəaliyyətə başladı. Belə ki, bu qan analizatorlar
22 parametrdə qanın bütün göstəricilərini 1 dəqiqə ərzində alır. Bu da
laboratoriya işinin sürətləndirilməsində böyük rola malikdir. Artıq biz 1 saat ərzində
55-60 qan analizini təyin edə bilərik. Biz bunlarla belə dayanmaq fikrində
deyilik. Biokimyəvi, bakteoroloji laboratoriyanın yenidən qurulması, yeni cərrahi
avadanlıqların alınması 2018-ci il ərzində görəcəyimiz işlərdir."
Hicranə İsmayılova
Xeberle.com
Foto: Kamran Kazımzadə
Xəbərdən istifadə edərkən istinad etmək vacibdir.
