Klinik təzahürlərdən asılı olmayaraq, xəstəliyin kəskin mərhələsində bir çox insanlar SARS-Cov-2 infeksiyasının ən azı iki ay davam edən və başqa diaqnozla izah olunmayan ilk simptomlarının başlanmasından təxminən 3 ay sonra patoloji simptomlar yaşayırlar.
Xeberle.com xəbər verir ki, bunu Səhiyyə Nazirliyinin mütəxəssis-eksperti Yusif Nağıyev post-COVID sindromuilə bağlı danışarkən bildirib.
Həkim qeyd edib ki, post-COVID zamanı ən çox görülən simptomlar yorğunluq, halsızlıq və öskürəkdir:
"Çox vaxt fiziki aktivlik zamanı gücün tükənməsi, yorğunluq müşahidə olunur. Post-COVID sindromunun epidemiologiyası kifayət qədər öyrənilməyib, hazırda bu istiqamətdə araşdırmalar davam edir. Məlumdur ki, sindromun təzahürləri geniş yayılıb.
Araşdırmaların nəticəsinə görə, koronavirus infeksiyasından sağalmış insanların 20-65 faizi 3-4 ay və ya daha çox müddətdə post-COVID sindromundan şikayətlənirlər. Simptomların müddəti 1-2 aydan bir ilə qədərdir”.
"Koronavirusun yayılmasının qarşısını almaq üçün tam peyvənd sxemindən istifadə etmək zəruridir. Bundan əlavə, insanların sıx olduğu yerlərdə tibbi maskadan istifadə etmək, otaqları tez-tez havalandırmaq və sosial məsafəni saxlamaqla hava-damcı infeksiyanın yayılmasının qarşısı alınır.
İnfarkt riski yüksək olan xəstələr (şəkərli diabet, piylənmə və hipertoniyadan əziyyət çəkənlər) hər üç aydan bir müntəzəm tibbi müayinədən keçməlidirlər. Həmçinin, heç bir halda bu komorbid vəziyyətləri idarə etmək üçün təyin edilmiş dərmanların qəbuluna fasilə verməməlidirlər.
Sağaldıqdan sonra stres vəziyyətindən mümkün qədər uzaq olmalı, 6 ay ərzində kofein, tütün, alkoqol, reseptsiz satılan bəzi öskürək və soyuqdəymə dərmanlarını qəbul etmək məsləhət görülmür.
Profilaktikaya gəldikdə isə sağlam həyat tərzi çox vacibdir. Bura müntəzəm fiziki fəaliyyət, bədən çəkisinin korreksiyası və tərkibində duz, şəkər, nişasta (çips, şirin qazlı içkilər, qənnadı və kolbasa məmulatları) olan qidaların məhdudlaşdırılması daxildir. Həmçinin psixoloji vəziyyəti bərpa etmək üçün istirahət önəmlidir”.
Xəbərdən istifadə edərkən istinad etmək vacibdir.
