Ermənistan-Azərbaycan münaqişəsinin həlli ABŞ-ın dövlət katibi Entoni Blinken üçün böyük əhəmiyyət kəsb edir və ABŞ Dövlət Departamenti buna böyük diqqət yetirir.
Xeberle.com xəbər verir ki, bunu ABŞ Dövlət Departamentinin mətbuat katibinin müavini Vedant Patel brifinqdə bildirib.
O xatırladıb ki, dövlət katibi Blinken bu yaxınlarda Ermənistan və Azərbaycan liderləri ilə danışıb və ABŞ bu məsələ ilə fəal məşğul olmağa davam edəcək.
ABŞ Dövlət Departamentinin mətbuat katibinin müavini həmçinin, Luis Bononun Qafqazda danışıqlar üzrə yeni baş müşavir təyin edilməsinə də toxunub.
"Cənab Bono ABŞ-ın Cənubi Qafqaza sülh və sabitlik gətirmək səylərinə rəhbərlik edəcək. Bu, Bayden administrasiyası üçün davamlı prioritetdir. Cənab Bono mürəkkəb məsələlərin həllində böyük təcrübəyə malikdir. O, dövlət katibi Blinkenin və bütün administrasiyanın bu yeni rolu öz üzərinə götürmək üçün şəxsi etibarına malikdir”, - Patel bildirib.
Vedant Patel əlavə edib ki, Luis Bononun bölgəyə səfəri ilə bağlı hələlik konkret açıqlama yoxdur.
Luis Bono yeni təyinatdan əvvəl Vyanada Beynəlxalq Atom Enerjisi Agentliyində və BMT-nin ofislərində ABŞ nümayəndəsi kimi çalışıb. O, həmçinin ABŞ-ın Müqəddəs Taxt-tacda müvəqqəti işlər vəkili, Bəsrədə (İraq) Regional Ofisinin direktoru vəzifələrində işləyib, dövlət katibinin iqtisadi məsələlər üzrə müşavirinin müavini olub.
Xəbərdən istifadə edərkən istinad etmək vacibdir.
