Azərbaycan XİN-i hesab edir ki, "Kanada Ermənistanı Laçın yolundan qanunsuz hərbi və iqtisadi fəaliyyətlər üçün istifadəni dayandırmağa çağırmaqla sülh prosesinə daha yaxşı kömək edə bilər."
Bu barədə Azərbaycan XİN-in Twitter hesabında Kanada XİN-in bəyanatı ilə bağlı deyilib.
"Kanada Xarici İşlər Nazirliyinin qərəzli bəyanatını qəti şəkildə rədd edirik", Azərbaycan XİN-in Twitter səhifəsində bildirilib.
Kanada XİN-i dekabrın 14-də Tvitter səhifəsində "Laçın dəhlizinin bağlanmasını" yaxından izlədiyini bildirib.
"Biz Azərbaycan hakimiyyətini dəhlizi yenidən açmağa və istənilən potensial humanitar təsirin qarşısını almaq üçün hərəkət azadlığını təmin etməyə çağırırıq", Kanada XİN-i Twitter vasitəsilə bildirib.
Bu arada, Rusiya sülhməramlı kontingentinin (RSK) rəhbərliyi RSK-nın məsuliyyət zonasında "pozuntular və təxribatların" qeydə alınmadığını bildirib.
Rusiya MN-in saytında yerləşdirilmiş son məlumata əsasən, ötən gün Xankəndi-Gorus avtomobil yolunda RSK-nın "7 nömrəli postundakı vəziyyət dəyişməz qalmaqdadır".
Danışıqlar prosesi zamanı RSK komandanlığı "Ermənistan və Azərbaycan tərəflərinin vəziyyətin həlli ilə bağlı təkliflərə cavab verməsini gözləyir", məlumatda deyilib.
"Rusiya sülhməramlılarının təhlükəsizliyini təmin etmək və mümkün insidentlərin qarşısını almaq üçün Azərbaycan və Ermənistan silahlı qüvvələrinin baş qərargahları ilə davamlı qarşılıqlı fəaliyyət davam etdirilir", Rusiya MN-i bildirib.
Litvanın Laçın yoluyla bağlı bəyanatı Bakıda "təəccüb və təəssüf" doğurub
Bunu bazar günü jurnalistlərin suallarına cavab verən Azərbaycan XİN-in mətbuat katibi Ayxan Hacızadə bildirib.
Litva XİN-i 16 dekabr tarixində "Dağlıq Qarabağ" adlandırdığı ərazidə "kəskin humanitar böhrana" səbəb olan "Laçın dəhlizinin" blokadasından "dərin narahatlıq" bildirib.
Bəyanatda deyilib ki, bu, "hərəkət azadlığına və Cənubi Qafqazda sülh prosesinə maneçilik" törədir.
Azərbaycan XİN-in mətbuat katibi Ayxan Hacızadə bununla bağlı deyib ki, suverenlik və ərazi bütövlüyü prinsiplərinə "xüsusi önəm vərən və daim bu prinsiplərdən çıxış edən" Litvanın belə bir bəyanatı "təəccüb və təəssüf doğurur."
Haçızadəyə görə, bu bəyanat Litva Prezidenti Gitanas Nauseda-nın may ayında Azərbaycanda apardığı "müxtəlif istiqamətli müzakirələr kontekstində anlaşılmazlıq yaradır."
Azərbaycan ərazisində "Dağlıq Qarabağ" ərazi vahidi mövcud deyil, XİN rəsmisi xatırladıb.
Onun sözlərinə görə, Litvanın "birtərəfli yanaşma tətbiq etməsi" narahatlıq doğurur.
Sonda Hacızadə bildirib ki, vətəndaş cəmiyyətinin etirazına hörmətlə yanaşılmalıdır və Azərbaycan tərəfi ölkə ərazisində yaşayan erməni sakinlərin "humanitar ehtiyaclarını qarşılamağa daim hazırdır."
Laçın yolundan maşınların keçdiyini göstərən görüntülər yayılır
Şuşa-Xankəndi yolunda keçirilən aksiyanın 7-cı günündə separatçı "Dağlıq Qarabağ hakimiyyəti" yolun onlar üçün bağlı qaldığını bildirir.
Bakıda yolun Azərbaycan tərəfindən bloklanması ilə bağlı ittihamları rədd edirlər.
Azərbaycan mediasında etirazçıların olduğu ərazidən "humanitar maşınların" keçdiyini nümayiş etdirən görüntülər yayılıb.
İnformasiya agentlikləri aksiya iştirakçılarını qorumaq üçün buraya Xarici Kəşfiyyat Xidmətinin xüsusi təyinatlı qüvvəllərinin gətirildiyini bildirir. İnternetdəki videolarda cərgəyə düzülən hərbçilərin alqışlandığını görmək olar.
Separatçı "Dağlıq Qarabağ hökuməti" Laçın dəhlizinin bağlanmasına görə, humanitar problemlərin yaşandığını bildirir.
Cümə günü Azərbaycan və Ermənistanın monitorinqi üzrə AŞPA-nın dörd həmməruzəçisi yolun açılmasına səsləyən birgə bəyanatla çıxış ediblər.
Bundan əvvəl bənzər çağırış, Avropa İttifaqı, ABŞ və beynəlxalq qurumlar tərəfindən səslənib.
Azərbaycan nümayəndələri mülki nəqliyyatın hərəkətinə mane olmadıqlarını, yolun rus sülhməramlıları tərəfindən bağlandığını bildirirlər. Rusiya sülhməramlıları bu məlumatı təkzib edib.
Şuşa-Xankəndi yolunda Rusiya sülhməramlıları kontingentinin (RSK) postu yaxınlığındakı aksiya dekabrın 12-də başlayıb. Etirazçılar RSK-nın məsuliyyət zonasındakı mədənlərə baxış keçirmək istəyən azərbaycanlı mütəxəssislərin əraziyə buraxılmasını tələb edirlər.
Laçın yolunda yaşanan gərginlik fonunda Bakı ilə Yerevan bir-birini sərhəddə atəşkəsi pozmaqda ittiham edir. Azərbaycan o cümlədən, son günlərdə Qarabağdakı Rusiya sülhməramlılarının məsuliyyət zonasında yerləşən erməni hərbçilərinin Azərbaycan hərbi mövqelərinə atəş açması ilə bağlı məlumatlar yayır
Xəbərdən istifadə edərkən istinad etmək vacibdir.
