Türkiyə - Azərbaycan dostluğu və qardaşlığı qədim tarixi irsə, zəngin ənənələrə malikdir. Eyni zamanda, Azərbaycan-Türkiyə əlaqələri Ulu Öndər Heydər Əliyevin dediyi kimi, "Bir millət, iki dövlət" tezisinə əsaslanır. Bu iki dövlət arasındakı səmimi dostluq münasibətlərinin demək olar ki, dünyada analoqu yoxdur. 27 sentyabr 2020-ci il tarixində başlayıb, 8 noyabr 2020-ci ildə böyük tarixi Zəfərimizlə bitən Vətən müharibəsinin hər saatında və hər dəqiqəsində qardaş Türkiyə daim Azərbaycanın yanında yer aldı. Türkiyənin ölkəmizə və xalqımıza göstərdiyi bu siyasi, mənəvi dəstək həmin tarixi günlərdə hər birimizi sonsuz qürurlandırdı. 8 noyabr Zəfərimizə biz sevindiyimiz qədər qardaş türk xalqı da sevindi. 44 günlük Vətən müharibəsindən bir qədər sonra 10 dekabr 2020-ci ildə Türkiyə və Azərbaycan prezidentləri Azərbaycan ordusunun Zəfər paradını birlikdə qəbul etdilər. Türkiyə prezidenti Rəcəb Tayyib Ərdoğanın Azərbaycanın haqq işinə dəstəyini açıq, birmənalı və sərt açıqlamalarla ifadə etməsi Azərbaycan xalqını çox sevindirdi. İstər hərbi əməliyyatların davam etdiyi dövrdə, istərsə də Qarabağın, Şərqi Zəngəzurun barpasının davam etdiyi hal-hazırki günlərdə qardaş Türkiyə dövləti daim Azərbaycanın yanındadır.
2021-ci il iyunun 15-də "Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi"nin imzalanması dünyaya bir daha nümayiş etdirdi ki, Azərbaycan-Türkiyə qardaşlığı sarsılmazdır. Məhz həmin gün dini, dili, tarixi, mədəniyyəti və məqsədi bir olan Azərbaycan və Türkiyə arasındakı münasibətlərin yeni inkişaf mərhələsi başladı. Bu elə bir inkişaf mərhələsidir ki, hər iki dövləti böyük nailiyyətlərə doğru aparacaq. Müdafiə qabiliyyətlərinin və hərbi təhlükəsizliyin möhkəmləndirilməsinə yönələn şəxsi heyət mübadiləsi, birgə təhsil və təlimlərin keçirilməsi, iki ölkənin silahlı qüvvələrinin birlikdə fəaliyyət qabiliyyətinin artırılması, müasir texnologiyalara əsaslanan silah və sursatların idarə olunmasında sıx əməkdaşlıq və digər məsələlər "Şuşa Bəyannaməsi"nin” əhəmiyyətini şərtləndirən mühüm amillərdir. Həmçinin də Azərbaycan və Türkiyə digər dost dövlətlərin orduları ilə birlikdə hərbi təlimlərin keçirilməsini dəstəkləyəcəklər. Sənədin digər bir vacib əhəmiyyəti də ondan ibarətdir ki, o Ermənistandakı revanşist qüvvələrə tutarlı ismarışdır.
Şuşa Bəyannaməsində razılaşdırılmış mühüm məsələlərdən biri də müxtəlif ölkələrdə yaşayan Azərbaycan və türk diasporları arasında əməkdaşlığın daha sıx inkişaf etdirilməsi, onların məruz qaldıqları ümumi problemlər qarşısında birlikdə addımların atılmasıdır.
15 iyun 2022-ci il tarixində Şuşa Bəyannaməsinin birinci ildönümü münasibətilə Şuşa şəhərində keçirilmiş beynəlxalq konfransda bir daha vurğulandı ki, Azərbaycan - Türkiyə strateji müttəfiqlik münasibətləri Qafqaz və region üçün sülh və sabitlik mənbəyidir. Şuşa Bəyannaməsinin Azərbaycan xalqı və dövləti üçün əlamətdar tarix olan 15 İyun – Milli Qurtuluş Günündə imzalanması və bir il sonra bununla bağlı beynəlxalq konfransın təşkil olunması qalib Azərbaycan milləti adına yüksək mənəvi önəm daşıyır.
Ramiz Hüseynov
YAP Sumqayıt şəhər təşkilatının sədri
Xəbərdən istifadə edərkən istinad etmək vacibdir.
