Türkiyədə mənzillənən azərbaycanlı oliqarx, gəmiçilik maqnatı Mübariz Mənsimov bu ölkə mediasının, daha doğrusu müxalif medianın hədəfindədir.
Bu dəfə Mənsimovun Türkiyənin hakim elitası ilə ortaq biznesi haqda "Sözçü” qəzeti yazıb. Qəzet AKP-çi iş adamlarının böyük çoxluğunun Mənsimovla ortaq olduğunu bildirir.
Bildirilir ki, AKP iqtidarının dövründə tenderləri udmaqla gündəmə gələn iş adamlarının biznes əlaqələrində 2007-ci ildə Türkiyə vətəndaşlığını qəbul edən Azərbaycan əsilli milyarder önə çıxır. Bu, "Palmali” şirkətlət qrupunun rəhbəri Mübariz Mənsimovdur. Mənsimov Türkiyə prezidentinin oğlu Bilal Ərdoğanın, qaynı Ziya İlgenin və qardaşı Mustafa Ərdoğanın ortaq olduğu "BMZ Group” şirkəti ilə dolaşıq gəmi biznesi ilə son günlər medianın gündəmdədir. Belə ki, "Palmali”nin cəlb etdiyi kreditlər hesabına inşa edilən neft tankerləri əvvəlcə "BMZ Group”a satılır, daha sonra "Palmali” həmin gəmiləri kirayələyərək Azərbaycan neftinin daşınmasını həyata keçirir.

Həmçinin Mustafa Ərdoğanın və qaynının ötən il satın aldığı Tuzla tərsanəsi də "Palmali”yə işləyir. AKP hakimiyyəti dövründə tender zənginlərinə çevrilən iş adamlarından keçmiş daxili işlər naziri Mehmet Ağarın oğlu Tolqa Ağar da Mənsimovun biznes ortaqları arasındadır. Qəzet iş adamının SOCAR-la ortaq biznesindən də bəhs edir. Həmçinin "Palmali”nin bütün şirkətlərində idarə heyətinin sədri olan Nurcan Nurcihan Perkerin ortaq olduğu "Bodrum Yalıkavak Turizm və Yaxta Limanı Yatırımları” şirkətinin ortaqları arasında PETKİM şirkətində müstəqil direktor olan Alaadin Aykaç yer alır. Həmin şirkətin digər ortağı keçmiş daxili işlər nazirinin oğlu Tolqa Ağardır. Qəzet Mənsimovun AKP-yə yaxın iş adamları ilə biznes ortaqlığının sxemini də dərc edib. (Virtualaz.org)

Xəbərdən istifadə edərkən istinad etmək vacibdir.