"MDB dövlət başçılarının Sammiti çərçivəsində Azərbaycan Prezidenti İlham Əliyevin Qırğızıstana səfəri baş tutub. Bu da bir həqiqətdir ki, Azərbaycan postsovet respublikaları içərisində Ermənistan xaric bütün dövlətlərlə sıx əlaqələr qurmağı bacarıb. Eyni şəkildə Qırğızıstanla da elmi, siyasi, mədəni və iqtisadi sahələrdə müəyyən bir dinamikaya nail ola bilib".
Xeberle.com xəbər verir ki, bu sözləri SİA-ya açıqlamasında politoloq Elçin Abdullayev deyib.
Onun sözlərinə görə, Azərbaycan və Qırğızıstan arasında iqtisadi dövriyyə bir o qədər yüksək olmasa da, bu iki dövlətin yüksək səviyyədə siyasi və diplomatik münasibətləri var: "Hesab edirəm ki, bu münasibətlərin formalaşmasında son zamanlar türkdilli dövlətlərin fəallaşmasında xüsusi rol oynayan Azərbaycan Respublikasının mühüm addımlarını görmək olar".
Politoloq sözlərinə davam edərək bildirib ki, bu addımların fonunda Orta Asiya dövlətlərində də müəyyən bir canlanma hiss olunmaqdadır: "Ümumiyyətlə, həm Qırğızıstan, həm də Azərbaycan aralarında olan münasibətlərin daha dərinləşməsində maraqlıdır. Çünki hər iki türkdilli dövlət Türk Birliyinə bir töhfə vermək istəyirlər və bu istiqamətdə addımlar atırlar. Düşünürəm ki, bu əlaqələrin davamı mütləq gətiriləcək. Həm Azərbaycan, həm də qırğız xalqı iki dövlət arasında olan xoş münasibətin bəhrəsini görəcəklər".
Xəbərdən istifadə edərkən istinad etmək vacibdir.
