Avropa İttifaqına (Aİ) daxil olmayan 11 dövlət, o cümlədən Ermənistan və Azərbaycan "Avropa Maqnitski siyahısı” adlanan məhdudiyyətin daha bir il müddətinə uzadılması qərarına qoşulub.
Xeberle.com məlumat verir ki, bu barədə Avropa İttifaqının xarici siyasət və təhlükəsizlik məsələləri üzrə ali komissarı Jozep Borrel bildirib.
Qeyd edək ki, Aİ Şurasının "Maqnitski siyahısı” insan hüquqlarının ciddi şəkildə pozulmasında günahkar olan şəxslərə qarşı tətbiq edilir.
"Maqnitski siyahısı” tərkib hissəsi kimi İran, Çin, Şimali Koreya, Rusiya, Suriya və digər ölkələrin vətəndaşlarına, təhlükəsizlik qüvvələrinə və şirkətlərinə qarşı Aİ-yə giriş qadağası, Aİ ölkələrinin ərazisindəki maliyyə aktivlərinin dondurulması tətbiq edilib.
"Dekabrın 4-də Aİ Şurası mövcud qadağa tədbirlərini növbəti 12 ay üçün, yəni 2024-cü il dekabrın 8-dək uzadıb və məhdudiyyətlərə məruz qalan şəxslər və qurumların siyahısını dəqiqləşdirib.
Aİ-yə namizəd ölkələr Şimali Makedoniya, Monteneqro, Albaniya, Ukrayna, Moldova, Bosniya və Herseqovina, həmçinin Avropa Azad Ticarət Zonasının üzvləri olan İslandiya, Lixtenşteyn, Norveç, eləcə də Ermənistan və Azərbaycan Aİ Şurasının bu qərarına qoşulublar”, - Borrell bildirib.
Bu bəyanatla paralel olaraq, Aİ-nin xarici siyasət xidməti demək olar ki, eyni mətnlə daha iki məlumat yayıb: Aİ Şurasının KXDR-ə qarşı sanksiyaların uzadılması və Dnestryanı rəhbərliyinə qarşı sanksiyaların tətbiqi ilə bağlı qərarlarına Aİ üzvü olmayan ölkələrin qoşulması haqqında. Ermənistan və Azərbaycan, üstəlik Serbiya və Gürcüstan istisna olmaqla, eyni ölkələr KXDR-ə qarşı sanksiyalara qoşulub. Azərbaycan, Ermənistan, İslandiya və Serbiya Dnestryanıya qarşı sanksiyalara qoşulmayıb.
Namizədlərdən Aİ-nin bütün sanksiya qadağalarına ardıcıl şəkildə əməl etmələri tələb olunur; bu olmadan onlar Aİ-yə qəbul prosesində kifayət qədər irəliləyiş əldə edə bilməyəcəklər. Avrointeqrasiya tərəfdarları arasında Brüsseli ən çox Rusiyaya qarşı sanksiyalara qoşulmaqdan ardıcıl olaraq imtina edən Serbiya qıcıqlandırır.
Aİ namizəd ölkə olmayan ölkələrə də oxşar təzyiqlər tətbiq etməyə çalışır, lakin bu halda onun təsir rıçaqları çox azdır.
Xəbərdən istifadə edərkən istinad etmək vacibdir.
