Azərbaycanda keçiriləcək növbədənkənar parlament seçkilərinə sayılı günlər qalıb və təbii olaraq seçkilər hazırda ölkənin əsas gündəm mövzusudur. Mandat əldə etmək üçün seçkilərdə iştirak edəcək namizədlər arasında siyasi partiyaların xeyli sayda üzvü var. Bəzi partiya liderləri seçkidə iştirak etməsələr də, təşkilatın digər üzvləri namizəd kimi irəli sürülüb. Bu il keçiriləcək parlament seçkiləri xüsusi əhəmiyyəti ilə seçilir. Səsvermə müstəqillik tariximizdə ilk dəfə olaraq ərazi bütövlüyü və suverenliyi tam təmin olunmuş Azərbaycanımızda baş tutacaq. Parlamentdə kimlərin yenidən mandat alacağı, 70 yaşı ötmüş millət vəkillərinin yenidən seçilmək, Milli Məclisdə təmsil olunmaq şansları ilə bağlı açıq suallar var.
Təsadüfi deyil ki, növbədənkənar parlament seçkilərinin budəfəki mərhələsində Sumqayıt üzrə yeni simalara da rast gəldik.
Xeberle.com-un məlumatına görə, 42 saylı Sumqayıt birinci seçki dairəsi üzrə namizədliyi qeydə alınanlar arasında müəllim, yazıçı, direktor, sosial işçi, risk mütəxəssisi, şöbə müdiri və işsiz şəxslər var. Lakin, işsiz namizədlər daha üstünlük təşkil edir. Ötən seçkilərdə YAP tərəfindən 41 saylı Sumqayıt birinci seçki dairəsindən namizədliyi irəli sürülən Hüseynova Hicran Kamran qızı 32.6 % səslə qalib gəlmişdi. Bu seçkilərdə isə Hicran Hüseynova YAP tərəfindən 42 saylı dairədən namizədliyi irəli sürülüb.
Qeyd edək ki, son seçkilərdə 42 saylı Sumqayıt ikinci seçki dairəsindən 50.1 % səslə Tahir Mirkişili qalib gəlmişdi.
Vətəndaş Həmrəyliyi Partiyasının siyahısı üzrə 42 saylı Sumqayıt birinci seçki dairəsindən namizədliyini irəli sürən yazıçı-publisist Əyyub Qiyası köhnə sumqayıtlı kimi ictimaiyyət yaxşı tanıyır. Əvvəlki seçkilərdə mübarizə aparan Kəramət Salah, Rəyasət Bağırov və Kamil Bədəlovun da asan təslim olmayacağı proqnozlaşdırılır. DOST İş Mərkəzində sosial işçi vəzifəsində çalışan 2001-ci il təvəllüdlü Fidan Mahmudovanın da namizədliyini verməsi müəyyən qədər gözlənilməz oldu. AMEA-nın Fəlsəfə-Sosiologiya İnstitutunun alimi Yasəmən Mahmudovanın (Qaraqoyunlu) seçki estafetində iştirakı bu dairəni daha maraqlı edir. Türkiyədən seçkilərə qatılan İstanbulun "Alternatifbank" təşkilatında risk mütəxəssisi vəzifəsində çalışan Şəfəq Mayılovanı isə mütəxəssislər "Troya atı" hesab edir. Məhz onun əsas rəqiblə ciddi mübarizə aparacağı gözlənilir.
Digər namizədlərdən Ramil Ağayev, Kamil Abdullayev və Ulduz Quliyevanın ciddi uğur qazanacağına inananlar çox azdır.
42 saylı Sumqayıt birinci seçki dairəsi ən şanslı namizəd isə hazırkı deputat Hicran Hüseynova hesab edilir.
Elşən Yəhyayev
Xəbərdən istifadə edərkən istinad etmək vacibdir.
