Azərbaycanda keçiriləcək növbədənkənar parlament seçkilərinə sayılı günlər qalıb və təbii olaraq seçkilər hazırda ölkənin əsas gündəm mövzusudur. Mandat əldə etmək üçün bu mübarizədə iştirak edəcək namizədlər arasında siyasi partiyaların üzvlərindən çox müxtəlif peşə nümayəndələri var. Bir çox partiya liderləri seçkidə iştirak etməsələr də, təşkilatın digər üzvlərinin namizədliyi irəli sürülüb.
Təsadüfi deyil ki, növbədənkənar parlament seçkilərinin budəfəki mərhələsində Sumqayıt üzrə yeni simalara da rast gəldik.
Xeberle.com-un məlumatına görə, 45 saylı Sumqayıt dördüncü seçki dairəsi üzrə namizədliyi qeydə alınanlar arasında 2 partiya nümayəndəsi, 2 müəllim, habelə bələdiyyə əməkdaşı, "Azərişıq" işçisi, eyni zamanda, ən gözlənilməzi və maraqlısı, Azərbaycan Respublikası Prezident Administrasiyasının sektor müdiri var. Bu dairədə namizədliyini öz təşəbbbüsü ilə irəli sürənlər üstünlük təşkil edir.
45 saylı Sumqayıt dördüncü seçki dairəsindən hakim YAP partiyasının namizədi Sumqayıt Dövlət Universitetinin iqtisadi məsələlər üzrə sabiq prorektoru Hacıyev Naib İsmixan oğludur. Naib Hacıyev bir müddət əvvəl prorektor vəzifəsindən azad edilib. Naib müəllim üçün seçki yarışında partiyanın elektoratı və digər resursları ilə yanaşı, üniversitetin tələbə-müəllim heyətinin onu yaxşı tanıması da üstünlükdür. Lakin maraqlıdır ki, seçiciləri ilə görüşlərdə digər rəqiblərinə nisbətən fəallığının az olduğu sezilir. Bu, onun seçki kampaniyasının ümumi nəticəsinə müəyyən təsir göstərsə də, sabiq prorektorun qələbə qazanmaq imkanlarını ciddi şəkildə azaltmır.
Sumqayıt şəhərinin 9 nömrəli məktəbində müəllim vəzifəsində çalışan Vüqar Abdullayev (Xəyal) də qüvvəsini sınayanlar arasındadır. Şəhər ictimaiyyəti arasında müəyyən qədər tanınan Vüqar Xəyal həm də media, ədəbiyyat sahəsində yazarlıq xüsusiyyəti ilə diqqət çəkib. Sumqayıtda onun pedaqoq və qələm dostları az deyil. Bu səbəbdən onun seçki marafonunda asanlıqla təslim olmayacağı ehtimal edilir.
Ədalət, Hüquq, Demokratiya (ƏHD) partiyasının bu dairədən namizədi Azər Qasımov isə Sumqayıtda elə üzdə olan publik sima deyil. Onun ilk üçlüyü düşməsi inandırıcı gəlmir.
Qeyd etdiyimiz kimi, bələdiyyə üzvlərindən də namizədliyini verən var. Araz Muradzadə Sumqayıt bələdiyyəsini təmsil edir və onun şansları aşağı qiymətləndirilir. Həmçinin "Azərişıq” ASC-nin Sumqayıt Elektrik Şəbəkəsində nəzarətçi kimi çalışan Ağamir Alıyev də namizədliyini bu dairədən verib. "Azkommers brokers" MMC-nin əməkdaşı olan Könül Allahverdili bu dairədən qüvvəsini sınayan ən gənc namizəddir.
Sözügedən dairədən öz təşəbbüsü ilə namizədliyini irəli sürənlərdən biri də Səbinə Salmanovadır. Azərbaycan Respublikası Prezidentinin Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin Siyasi partiyalarla iş sektorunun müdiri Səbinə Salmanovanın qələbə şansının daha çox olduğu gözlənilir. Hətta Sumqayıtın digər seçki dairələri üzrə namizədlərin təbliğat-təşviqat işlərinə nəzər yetirsək, məhz S.Salmanovanın ən uğurlu və rəngarəng kampaniya qurduğu müşahidə olunur. O, əsl Sumqayıt sakini kimi şəhərini yaxşı tanıyır və problemlərinə bələddir. Xanımın Sumqayıtdan namizədliyini verməsi çoxlarında onun bir sıra probləmlərin həllində yaxından iştirak edəcəyi inamını artırıb. 1 nömrəli məktəbin məzunu olan S.Salmanova təcrübəli hüquqşünas, diplomatiya və siyasəti gözəl bilən prinsipial ziyalı xanımdır. Xüsusilə sakinlərin müxtəlif zümrələri ilə gündəlik görüşlər onun seçilmə şansını birə beş artırıb. Vəkillərini şəhərin tanınmış ziyalılarından seçməsi də Səbinə xanımın uğurlu gedişi kimi qiymətləndirilməlidir.
Beləliklə, aparılan təbliğat işləri və şəhər sakinlərinin fikirlərinə əsasən deyə bilərik ki, 45 saylı Sumqayıt dördüncü seçki dairəsində ən şanslı namizəd Səbinə Salmanova hesab edilir. Adıçəkilən namizədin nəzərəçarpacaq fərqlə rəqiblərini geridə qoyacağı gözlənilir.
Elnur Ağayev
Xeberle.com saytının baş redaktoru
Xəbərdən istifadə edərkən istinad etmək vacibdir.
