FİFA (Beynəlxalq Futbol Federasiyaları Assosiasiyası) prezidenti Yozef Blatter quruma prezident seçildikdən dörd gün sonra vəzifəsindən istefa verdi. O, FİFA-nın İcrayə Komitəsinin üzvlərindən yaxın zamanda növbədənkənar konfransının çağrılmasını və quruma yeni prezidentin seçilməsini xahiş edib.
Blatterin istefası son günlər FİFA rəhbərliyində təmsil olunan şəxslərin adlarının korrupsiya cinayətlərində hallanması ilə bağlıdır. Son qalmaqal dünyanın aparıcı ölkələrindən korrupsiya faktının olduğunu bir daha təsdiq etdi.
"Konstitusiya” Araşdırmalar Fondunun prezidenti Əliməmməd Nuriyev açıqlamasında bildirib ki, FİFA-dakı son korrupsiya qalmaqalı bütün dünyada korrupsiyanın olduğunu göstərdi.
QHT rəhbərinin sözlərinə görə, FİFA-da baş verən hadisələr müxtəlif məsələlərlə bağlıdır.
"FİFA-da maraqlı proseslər baş verir. Diqqət yetirin ki, dünya gücləri geosiyasi, iqtisadi maraqlarını daha böyük dövlətlərin, şirkətlərin maraqlarına uyğun olaraq həyata keçirmək istəyirlərsə, müxtəlif priyomlardan istifadə edirlər. Birincisi, ilkin mərhələdə razılığa gəlmək.
Əgər ilkin mərhələdə əlverişli şərtlərlə razılıq əldə olunmasa, dərhal başqa variantı işə salırlar. Həmin ölkələrdə insan hüquqlarının vəziyyəti necədir, rəqabət imkanları nədən ibarətdir, xarici sərmayelərin qoyulması ilə bağlı məsələlər araşdırılır.
Guya bəzi ölkələrdə rəqabətə imkan verilmir, insan hüququları pozulur, məhkəmə müstəqil deyil, iqtisadi rəqabət yoxdur, xarici sərmayelər qoyulmur və s. kimi məsələləri göstərməklə həmin ölkəni və orda fəaliyyət göstərən şirkətlərin reytinqlərini aşağı salırlar. Bu kimi məsələlərlə həmin ölkəyə təsir göstərirlər. Başqa bir halda onlar korrupsiyanın səviyyəsini ölçməklə məşğul olan beynəlxalq təşkilatlara həmin ölkədə korrupsiyanın yüksək olması ilə bağlı məlumatlar təqdim edirlər. Beləcə, çoxtərəfli təzyiq rıçaqlarından istifadə edilir”.
Fond prezidentinin sözlərinə görə, FİFA məmurları imkanlarının böyük olması və beynəlxalq təşkilatlarda üstün mövqelərinə görə, qərar qəbuletmə prosesinə təsir göstərə bilirlər.
"Dövlət büdcəsindən, ayrı-ayrı fondlara ayrılmış vəsaitlər vasitəsilə, müxtəlif offşor zonalarda müəssisələr yaratmaqla və bu müəssisələr vasitəsilə onlara yardım edirlər. Beləliklə, həmin təşkilatların özlərinin fəaliyyəti üçün imkan yaranır. Onlara kim daha çox şərait yaradırsa, onların maraqlarına uyğun hərəkət etməyə çalışırlar. Beynəlxalq və dövlətlərarası qurumlar, məsələn- ATƏT, Avropa Şurası kimi qurumlar vasitəsilə qərarların qəbul olunmasına nail olurlar. Təzyiqlər əslində maksimum dərəcədə həmin ölkələrdə real vəziyyətin ölçülməsinə yox, iqtisadi, geosiyasi, biznes maraqlarına yönəlir”.
Ə. Nuriyev vurğulayıb ki, bir çox güc dövlətləri təhqiqatçı jurnalistlər adı altında xüsusi quruplar yaradırlar. Qısa zaman kəsiyində böyük araşdırmaçı jurnalist qrupu offşor zonalardakı hesablara daxil olur, banklardakı məlumatları əldə edirlər. Halbuki, həmin hesablara daxil olmaq üçün çox böyük resurslara malik olmaq lazımdır.
"Belə məlumatlara daha çox güclü dövlətlər və ya güclü dövlətlərin xüsusi xidmət orqanları çıxış əldə edə bilər. Başlayırlar bu məlumatları təhrif edilmiş formada yayamağa. Nəticədə isə öz maraqlarında olan ölkəni daha gərgin göstərsinlər”.
QHT rəhbərinin fikrincə, Blatter 1998-ci ildən həmin FİFA-ya rəhbərlik etsə də korrupsiya faktlarının niyə məhz indi açılması sual doğurur.
"Necə oldu ki, indiyədək korrupsiya faktları aşkarlanmadı, son anda korrupsiya baş verdi. Deməli, bu əvvəllər də olub. Sonuncu təzyiqlə bağlı bütün dünya danışır. Hər kəs deyir ki, bu Rusiyanın dünya çempionatına ev sahibliyi etməsi ilə bağlıdır. Bunun nə dərəcədə həqiqət olmasını deyə bilmərik. Bəlkə də burada həqiqət var. Amma məsələ daha çox siyasi məqsədə yaxındır. Beynəlxalq Futbol Federasiysına təzyiq etməklə əslində siyasi proseslərə təsir etmiş olurlar.
Buna qalsa BMT-də və Dünya Bankında da dəfələrlə korrupsiya qalmaqalları olub. Amma həmin qurumlarda bu məsələ qabardılmadı. Çünki həmin təşkilatlar ayrı-ayrı güc mərkəzlərinin maraqlarına uyğun siyasət həyata keçirir”.
Ə. Nuriyev onu da qeyd edib ki, bəzi hallarda Azərbaycanda mətbuat azadlığı ilə bağlı məsələni Cənubi Koreya ilə eyni səviyyəyə qaldırırlar. Bu da ölkəmizə qarşı bir təzyiq vasitəsidir.
"Bu gün Azərbaycanda mətbuat internet səviyyəsinin azadlığına görə, ilk 50-likdə ola bilər. Onu gətirib 188-ci yerdə qoymaq absurddur. Bəzən bundan istifadə olunur. Eyni zamanda korrupsiya səviyyəsinin yüksək olması həmin ölkəyə investisiyaların yatırımlarının qarşısını almasına xidmət edir. Azərbaycanın rəqabət qabiliyyəti hər il artır.
Məsələn ötən il Azərbaycana 29 milyard sərmaye qoyulub ki, onun 11 milyardı xarici sərmayedir. Son 10 ildə isə ölkəmizə 200 milyard sərmaye qoyulub. Çox nəhəng rəqəmdir. Bu da onu göstərir ki, bəzi beynəlxalq təşkilatların göstərdiyi kimi Azərbaycanda heç də korrupsiyanın səviyyəsi elə də yüksək deyil. Korrupsiyaya qarşı mübarizə gedir və yetərincə effektli nəticə verir.
Prezident də öz çıxışında iki istiqaməti xüsusilə vurğuladı. "ASAN Xidmət”in yaranması Azərbaycan brendinə çevrilib. Dövlət Qulluğuna qəbulda korrupsiya sövdələşmələri ilə bağlı hər hansı fikir söyləmək yalnış olardı. Bundan başqa elektron xidmətlərə keçmək də korrupsiyaya qarşı Azərbaycanda böyük iradə olduğunu göstərdi”.
Ə. Nuriyev əlavə edib ki, Azərbaycana qarşı hücumların arxasında bir neçə məqam dayanır. Birincisi geosiyasi , iqtisadi, maliyyə maraqlarının heç də onların arzu və istədiklərinə uyğun olaraq həyata keçməməsidir. İkincisi isə erməni lobbisinin bir çox beynəlxalq təşkilatlarda oturub dövlətlərə təsir etməsidir ki, bu da onların yanlış qərarlar qəbul etməsinə səbəb olur. (azvision.az)
Xəbərdən istifadə edərkən istinad etmək vacibdir.
