"Hesab edirəm ki, HDP AKP-dən Ermənistanla sərhədlərin açılması və diplomatik münasibətlərin bərpa edilməsini tələb edəcək. Bu tələbin yerinə yetirilib-yetirilməməsindən asılı olmayaraq, belə bir təzyiq hökumətə qarşı güclənəcək".
Bu sözləri açıqlamasında "Atlas” Araşdırmalar Mərkəzinin rəhbəri Elxan Şahinoğlu bildirib.
Onun sözlərinə görə, əgər keçmişdə AKP təkbaşına hökumət formalaşdırıb özü Ermənistanla münasibətləri normallaşdırmaq siyasəti yürüdürdüsə, indi isə siyasi durum dəyişib: "O zaman da kürdlərin partiyası Ərdoğandan Ermənistanla sərhədlərin açılmasını, diplomatik münasibətlərin qurulmasını istəyirdi. Amma o zaman onlar parlamentdə az idilər, partiya kimi formalaşmamışdılar. İndi isə səslərini iki qat artırıblar, 80-ə yaxın millət vəkili ilə parlamentdə təmsil olunacaqlar. Belə olan halda istər koalisyonda yer alsınlar, istərsə də müxalifət kimi onların səsi daha gur gələcək. Böyük ehtimalla hesab edirəm ki, hakim partiyadan Ermənistanla sərhədlərin açılması və diplomatik münasibətlərin bərpa edilməsini tələb edəcəklər. Bu tələbin yerinə yetirilib- yetirilməməsindən asılı olmayaraq, belə bir təzyiq hökumətə qarşı güclənəcək.
Digər amilə görə isə, Türkiyə tarixində ilk dəfə AKP, CHP və HDP-nin hər birindən biri olmaqla parlamentdə üç erməni təmsil olunacaq. Bunlar o millət vəkilləridir ki, namizədliyi verilərkən də "erməni soyqırımı”nın tanınması ilə bağlı çağırışlar edirdilər. Onların da səsi gur çıxacaq”.
Politoloq qeyd edib ki, bütün hallarda Azərbaycanla strateji müttəfiqlik münasibətləri qorunmalıdır: " Amma Türkiyə parlamentinin indiki konfiqurasiyası həm də ondan xəbər verir ki, hökumətə Ermənistanla münasibətlərə görə təzyiqlər artacaq. Bu nəticəni Azərbaycanda ciddi analiz etməliyik və gələcəkdə Türkiyə ilə münasibətlərdə bu amili nəzərə almalıyıq”.
Koalisiya hökumətinin qurulmasına gəlincə isə, E.Şahinoğlu AKP ilə MHP-nin birlikdə hökumət qurmasını daha real hesab edir: "Əgər AKP HDP ittifaq qurarsa, bu zaman radikal kürdlər ilk dəfə olaraq hökumətdə təmsil olunacaqlar. Ermənistanla bağlı, bundan əlavə, baş terrorçu Abdulla Öcalanın azad edilməsi məsələlərini qaldıracaqlar ki, bu da Türkiyəni qarışdıra bilər. Bu MHP-nin də maraqlarına ziddir. MHP həm də ona görə koalisiyada olmalıdır ki, radikal kürdlərin hökumətdə təmsil olması mümkün olmasın”. (qafqazinfo.az)
Xəbərdən istifadə edərkən istinad etmək vacibdir.
