24 ölkədən 95 vəkil hüquq müdafiəçisi İntiqam Əliyevin dərhal və qeyd-şərtsiz azad olunmasına çağırış edib, Human Rights House Foundation yazır.
Prezident İlham Əliyevə ünvanlanmış məktubda müstəqil hüquqşünaslar və vəkillər həmkarlarının həbs olunmağından narahatlığını bildirirlər.
"Biz inanırıq ki, hər kəsin ədalətli məhkəmə hüququ var. İntiqam Əliyevin məhkəməsində işin materialları üçün ictimai dinləmə və sənədləri əldə etmək hüququ təmin olunmayıb. Bundan başqa, İntiqam Əliyevin vəkili onun qeydiyyatsız layihələrin həyata keçirilməsində günahkar olmadığını sübut edib", məktubda deyilir.
Məktubu Human Rights House Foundation-un "Vəkillik fəaliyyətində beynəlxalq hüquq" lahiyəsində iştirak edən müxtəlif ölkələrindən olan vəkillər imzalayıblar. Həmçinin, bu çağırışa ABŞ, Kanada, Misir, İran və Qərbi Avropadan olan hüquqşünaslar da qoşulublar.
İntiqam Əliyev 2014-cü il avqustun 8-də həbs olunub və vergidən yayınma, vəzifə səlahiyyətlərindən sui-istifadə, qanunsuz sahibkarlıq və mənimsəmə maddələri ilə ittiham olunurdu.
2015-ci ilin aprelin 22-də hüquq müdafiəçisi 3 il dövlət və bələdiyyə qurumlarında rəhbər vəzifə tutmaq haqqından məhrum edilməklə 7 il 6 ay müddətinə azadlıqdan məhrum edilib.
Beynəlxalq təşkilatlar onun həbsini siyasi motivli sayır.
Azərbaycan hökuməti bu iddianı rədd edir və ölkədə insanların siyasi baxışlarına yox, əməllərinə görə cinayət məsuliyyətinə cəlb olunduğunu deyir. (bbc.com)
Xəbərdən istifadə edərkən istinad etmək vacibdir.
