Finlandiya sığınacaq istəyənlər arasında Avropanın ən populyar ölkələrindən birinə çevrilib. Bu ölkənin immiqrasiya xidmətinin baş direktoru Yaana Vuorionun sözlərinə görə, bəzi həftələrdə Finlandiya qaçqınların qeydiyyata alınmış sayına görə Avropada üçüncü yerə çıxıb.

Bu il İraqdan Finlandiyaya sığınacaq istəyən 12 min nəfər gəlib. Avqustun sonuna qədər onların yarısı Finlandiyada yaşamaq hüququnu təsdiq edən sənəd alıb. İndi bu vəziyyət dəyişə bilər, çünki immiqrasiya xidməti iraqlıların müraciətlərinə baxılmasını müvəqqəti dayandırıb. Bununla əlaqədar, İraqdan olan sığınacaq istəyənlər Helsinkinin mərkəzində nümayiş keçiriblər.

Həmin nümayişin Əhməd Şükür adlı iştirakçısı deyib ki, o, İraqa qayıda bilməz, çünki orada onu öldürərlər.

Finlandiya immiqrasiya xidmətində vəd ediblər ki, gələn həftənin əvvəlində İraqda hansı regionların təhlükəsiz hesab olunmasını elan edəcəklər. Bundan sonra iraqlıların ərizələrinə yenidən baxılacaq.

Hazırda Finlandiyada bəzi regionlar təhlükəli hesab edilir. İsveç isə həmin regionların təhlükəsiz olduğunu bildirib. Buna görə də iraqlıların Finlandiyada sığınacaq alması İsveçdəkinə nisbətən daha asandır.

Finlandiyada sığınacaq almaq xahişinə rədd cavabı verilmiş şəxs inzibati məhkəməyə şikayətlə müraciət edə bilər.(Azərtac)