Seçki marafonu: Favoritlər, autsayderlər, qocamanlar və debutantlar...

Parlament seçkilərinə cəmi 10 gün qalır. Namizdlər özlərini tanıtmaq üçün təşviqatın gərgin mərhələsindədirlər. Məlumat üçün deyək ki, seçkilərdə iştirak etmək üçün ölkə üzrə ümumilikdə 1240 namizəd qeydə alınıb.

Mərkəzi Seçki Komissiyasının mətbuat xidmətindən "168 saat”a verilən məlumata görə, 15 siyasi partiyanın namizədi bu seçkilərdə iştirak edəcək.

Biz bu materialda əsasən Sumqayıt üzrə seçki dairələrindəki vəziyyəti üzərində dayanacaq, namizdələri tanımağa və onların şanslarını dəyərləndirməyə çalışacağıq.

İlk olaraq deyək ki, namizədlər Sumqayıt üzrə 4 seçki dairəsində yarışacaqlar. Bu dairələr üzrə qeydə alınmış namizdələrin sayı 33-ə bərabərdir.

41 SAYLI SUMQAYIT BİRİNCİ SEÇKİ DAİRƏSİ

41-ci dairədə marafona 10 namizəd qatılıb. Bu dairədə hakim partiya YAP ötən 5 illikdə Sumqayıtda parlamentdə təmsil etmiş Leyla Abdullayeva ilə qatılmışdı. Ancaq sonradan onun namizədliyi geri götürüldü. Bu partiya tərəfindən Leyla xanımın dövlət qulluğunda çalışmaq qərarı ilə izah edildi.

Əslində, hələ YAP-ın siyahısı açıqlanmamış L.Abdullayevanın namizdəliyinin verilməyəcəyi proqnozlaşdırılırdı. Ancaq xanım deputatın adının siyahıda olması da sürpriz deyildi və belə də oldu. Sonradan verilən qərar proqnozları doğrultdu. Beləliklə, hakim partiya 41 saylı dairəni boş buraxmış oldu. Ancaq təşviqatın gedişində məlum oldu ki, bu dairədə Mirzəcan Xəlilova isti münasibət var – hakim partiya öz elektoratını bu namizədin dəstəklənməsinə yönəldir. "AZƏRSUTƏCHİZAT TİKİNTİ" ASC-nin sədri olan M.Xəlilovun rəqibləri ilə müqayisədə bu baxımdan da şansı yüksəlir və o, dairənin lideri kimi görünür.

Digər 3 partiya (Ümid, AMİP, ASDP) və bir blok (Azadlıq-2015) təmsilçisinin isə daha çox müxalifyönlü və nisbətən müxalifyönlü elektoratın səsini qazanmağa çalışacağını proqnozlaşdırmaq olar. Onların içərisində AMİP Sumqayıt şəhər təşkilatının sədri Dünyamin Əhmədli və Müsavat-AXCP hakimiyyəti dövründə icra başçısının müavini postunu tutmuş Musavatçı Oqtay Tahirov seçki təcrübəsinə görə rəqiblərini qabaqlayır.

Sumqayıtın ən gənc namizədi də bu dairədən mübarizəyə qoşulub. Ümid Partiyasının təmsilçisi olan 26 yaşlı Həcər Abbaslının daha enerjili təşviqatına şahidlik edirik.

MİS İdarəsinin baş mühəndisi Ataş Məmmədovun dairə ərazisindəki MİS-lərin dəstəyi ilə ilk üçlüyə iddia edə biləcəyini söyləmək olar. O, uzun illərdir ki, hazırkı postundadır və şəhərdə az-çox tanınır.

42 SAYLI SUMQAYIT İKİNCİ SEÇKİ DAİRƏSİ

42 saylı seçki dairəsində 8 namizəd mandat uğrunda mübarizə aparacaq. Onların arasında cəmi ikisi siyasi partiya təmsilçisidir. YAP və ADİSP təmsilçilərindən başqa digər namizədlər öz təşəbbüsü ilə marafona qoşulub.

Bu dairədə əsas mübarizə iki iqtisadçı – hakim partiyanı təmsil edən Tahir Mirkişili ilə "Turan” İnformasiya Agentliyinin əməkdaşı Hafiz Babalı arasında gedəcək. H.Babalı "Real” hərəkatının nümayəndəsi olsa da, seçki dairəsində "öz təşəbbüsü” ilə qeydiyyata alınıb. O müxalifyönlü elektoratın səsinə ümid edəcək.

Bu dairədə ən ciddi rəqib ola biləcək "Azəri-Türk Qadınlar Birliyi”nin sədri Tənzilə Rüstəmxanlının namizdəliyinin qeydə alınmaması isə dairədəki vəziyyəti yumşaldıb.

H.Babalı birinciliyiə iddalı kimi görünsə də, onun YAP təmsilçisinə "diş" göstərə biləcəyi inandırıcı görünmür. Məsələ burasındadır ki, hakim partiyanın bu dairədə "meydana buraxdığı” iqtisad elmlər namizədi T.Mirkişili öz "back raund”u ilə istər bu, istərsə də digər rəqiblərini bir neçə baş üstələyir.

2004-cü ildə ABŞ-ın Stanford Universitetinde İKT İqtisadiyyatının idarəedilməsi üxrə ixtisaslaşmış proqramı bitirib. Heydər Əliyev Mərkəzi” ,"ASAN Xidmət”, "Elektron İmza”, "Elektron Hökumət”, "Elektron Təhlükəsizlik”, "Elektron Təhsil”, "Made in Azerbaijan” kimi uğurlu layihələrin həyata keçməsində bilavasitə iştirak edən T.Mirkişiliyə hakimiyyətin yüksək eşalonlarında isti münasibətin olduğu söylənilir. Onun xidmətləri dövlət başçısı tərəfindən də qiymətləndirilib: 2012-ci ildə İKT sahəsində xidmətlərə görə Azərbaycan Prezidenti tərəfindən "Tərəqqi” medalı ilə təltif olunub.

Bu dairəni "ən gənc” iki dairədən biri hesab etmək olar – söhbət ondan gedir ki, 8 namizəddən 3-ü gəncdir.

İstənilən halda nə kitabxana işçisinin, nə balatmeystrin, nə də orta məktəb müəlliminin mandata iddialı olduğunu düşünmək sadəlövhlük olardı.

43 SAYLI SUMQAYIT ÜÇÜNCÜ SEÇKİ DAİRƏSİ

Dairədə 7 namizəd seçicilərin səsini almağa çalışır. Yeni Azərbaycan Partiyası yalnız bu dairədə namizədini dəyişməyib. Bu, özlüyündə maraqlı və müzakirə olunmalı faktdır. Görünür, hakim partiya Sumqayıt üzrə yalnız bir millət vəkilinin işindən razı qalıb.

YAP-ın rahatlığının nəticəyə sirayət edəcəyini proqnozlaşdırmaq olar. Nəzərə alsaq ki, bu partiyanı bu dairədə ötən 5 illikdə təmsil etmiş Muxtar Babayev şəhərdə öz reputasiyası ilə seçilir. "Azərikimiya” İB-nin Müşahidə Şurasının sədri şəhər ictimaiyyətinin rəğbətini işgüzarlığı ilə yanaşı, məmur-vətəndaş münasibətlərindəki nümunəsi ilə də qazanıb. YAP-ın daha sistemli işləyəcəyini və seçki təcrübəsini də bu nüfuzun üzərinə əlavə etsək, M.Babayevi dairənin favoriti adlandırmaq olar.

Ancaq bu dairədə də rahat qələbə yoxdur. Gənclərin əməlli-başlı işlədiyini hiss etməmək mümkün deyil. "Sumqayitxeber.com” saytının baş redaktoru Eyvaz Qocayev şəhərdə bir çox ictimai-mədəni tədbirlərin təşkilatçısı olub, jurnalist kimi şəhər həyatında aktiv iştirak edib. Böyük bir gənc elektoratın onu dəstəkləyəcəyi indidən aydındır. E.Qocayev sosial şəbəkələrdə ən aktiv təşviqat aparan namizəd kimi də ön plana çıxıb.

Ancaq dairədə daha iki gənc var – keçmiş "Musavat”çı Kəramət Salayev və müəllim, "Real” partiyasının üzvü Elçin Mahmud. Maraqlıdır ki, E.Mahmud da digər partiyadaşı kimi dairədə "öz təşəbbüsü” ilə qeydiyyata düşüb.

Dairədə digər namizdələrdən isə ciddi nəticə gözləməyə dəyməz, onların namizdəliyi daha çox formal xarakterli görünür.

***

44 SAYLI SUMQAYIT-XIZI SEÇKİ DAİRƏSİ ÜZRƏ QEYDƏ ALINANLARIN SİYAHISI

44-cü dairədə 9 namizəd mandat uğrunda marafona atılıb. Dairədə kimin daha şanslı olmasına gəlincə isə deməliyik ki, YAP-ın Sumqayıt üzrə ən zəif bəndi bu dairədədir. "Aztelekom” İstehsalat Qovşağında şöbə müdiri postunu tutan Nurlan Əsgərovun bu vaxta qədərki fəaliyyəti onu yetərincə populyarlaşdırmayıb. Odur ki, YAP-ın digər dairələrdə olduğu kimi bu dairədə də favorit olduğunu söyləmək çətindir. Əvəzində hakimiyyətyönümlü mövqeyi ilə seçilən, ötən 5 illikdə Sumqayıtı parlamentdə təmsil etmiş Hacı Salayev daha şanslı görünür. Atası Sumqayıt, anası Xızıda anadan olan H.Salayevin həm ailəsinə, həm də özünə dairə ərazisində daha isti münasibət var. Əlindəki maddi resurslar da keçmiş "KQB” əməkdaşına daha aktiv təşviqat aparmağa imkan verir. Ehtiyyatda olan polkovnik rütbəli zabit bizneslə yanaşı, elmə də maraq göstərir: Belə ki, deputat AMEA-nın İqtisadiyyat İnstitutunun dissertantıdır.

Digər namizdələrin isə şansları barədə danışmaq ciddi görünmür: Başqa sözlə, bu dairədə kiminsə boyundan yüksəyə tullanacağı inandırıcı deyil.

Beləliklə, yekunlaşdıraq və bir qədər riskə gedərək mandata ən yaxın olan 4 namizədin adını açıqlayaq:

41-ci dairə: Mirzəcan Xəlilov

42-ci dairə: Tahir Mirkişili

43-cü dairə: Muxtar Babayev

44-cü dairə: Hacı Salayev

Vüsal Məmmədov, 168saat.com