Rusiya və Neft İxrac edən Ölkələrin Təşkilatı (OPEC) hasilatın dondurulması barədə razılaşma əldə edə bilər. Yəni, İran təşəbbüsə qoşulmasa belə, buna gedəcəklər.

Bu barədə OPEC rəsmisi Bloomberg News-a məlumat verib. Nawal al-Fezaia-nın açıqlamasından dərhal sonra, aprelin 6 və 7-də dünya bazarında neftin qiyməti 5 faizdən çox qalxıb.
Azadliq.org-un məlumatına görə, Fezaia deyib ki, neft hasil edən ölkələrin hasilatın dondurulması barədə razılığa gəlməkdən başqa yolu yoxdur. Tərəflər aprelin 17-də Qətərin paytaxtı Dohada görüşəcəklər.

Hasilatı dondurmaq üzrə ilkin razılıq ilin əvvəlində Rusiya və Səudiyyə Ərəbistanı arasında əldə olunub. Rusiya mənbələri aprelin 6-da Reuters agentliyinə bildiriblər ki, Rusiya ilə OPEC artıq detalları müzakirə edir.

Fezaia düşünür ki, neftin qiyməti ilin sonuna 45-60 dollar arasında qərarlaşa bilər.

Aprelin 6-da Londonda Brent neftinin barrelinin qiyməti 1.97 dollar artaraq 39.84 dollara bərabərləşib.("Qafqazinfo”)