Azərbaycanın tanınmış politolqlarından biri olan Zərdüşt Əlizadə Azərbaycanla Ermənistan arasında başlanması mümkün olan müharibə ilə bağlı bir müddət öncə maraqlı açıqlama verib. Teleqraf.com həmin açıqlamanın bu gün də aktual olduğunu nəzərə alaraq yenidən oxuculara təqdim edir.
Əlizadə açıqlamasında hətta Azərbaycan ordusunun ermənilərə neçə istiqamətdən zərbə endirəcəyi ilə bağlı proqnozlarını da açıqlayıb.
Onun sözlərinə görə, bu gün situasiya kifayət qədər dəyişib. «Bu gün Ermənistan əhalisi 1,7 milyon nəfərdir. Azərbaycanın əhalisi isə 9 milyonu keçib. Ermənistan bu gün faktiki olaraq iflas edib. Azərbaycanın isə 25 milyard dollardan artıq pul ehtiyatı var. Azərbaycan ordusunda hardasa 100-110 min döyüşçü var. Bundan əlavə, əgər ehtiyatda olanları da səfərbərliyə alarlarsa, o zaman bu rəqəm 200 mindən artıq olacaq. Azərbaycanın artilleriya sistemləri var, aviasiyası mövcuddur. Bu gün bizdə elə müasir silahlar var ki, Ermənistanda onlar yoxdur. Raketlər var».
Zərdüşt Əlizadə hücum taktikası ilə bağlı fikirlərini də qeyd edib. «Azərbaycan ordusu müharibə başlayacağı təqdirdə ermənilərə üç istiqamətdən zərbə endirəcək. Bu istiqamətlərdən biri İran sərhədləri yaxınlığından baş verəcək. Çünki həmin istiqamətdən Füzuli, Cəbrayıl və Zəngilanı almaqla Qubadlı və Laçına çıxmaq istəyəcəyik. İkinci istiqamət isə birbaşa düz mərkəzdən olacaq. Yəni, ən güclü zərbə Ağdam istiqamətindən vurulacaq ki, oradan Xocalıya, Əsgərana və Xankəndinə çıxmaq mümkün olsun. Sonuncu istiqamət isə Murov dağından olacaq ki, bu da Kəlbəcəri düşmən tapdağından azad etmək üçün lazımdır. Ermənistan ordusunun üç istiqamətdən hücumların qarşısını almaq üçün resursu çatacaqmı? Əgər onlar düşünürlər ki, müharibə zamanı Bakıya zərbə endirəcəklər, o zaman Naxçıvandakı korpusumuz 70 km aralıdakı İrəvana hücum edəcəklər».
Politoloq rusların ermənilərə müharibədə kömək edəcəyi ilə bağlı deyilən fikirlərə də aydınlıq gətirib. Zərdüşt Əlizadə bu fikirlərin yanlış olduğunu və heç bir reallığa əsaslanmadığını vurğulayıb. «Ermənilər deyirlər ki, müharibə olacağı təqdirdə Rusiya onlara hərbi yardım edəcək. Bu əsaslandırılmamış fikirlərdir və reallığı əks etdirmir. Düzdür, Moskva İrəvanın qarşısında öhdəlik götürüb. Lakin bu öhdəlik Ermənistana kimsə hücum edəcəyi təqdirdə onu müdafiə etməkdən ibarətdir. Lakin döüşlər Ermənistan ərazisində deyil, bütün dünya tərəfindən tanınan Azərbaycan torpaqlarında gedəcək. Başadüşülən deyil ki, Ermənistan ordusunun orada nə işi var. Əgər Ermənistan Gürcüstan variantına ümid bəsləyirsə, o zaman yenə yanılır. Birincisi ona görə ki, Abxaziya və Cənubi Osetiyada Rusiyanın sülhməramlı qüvvələri vardı. İkincisi də həmin ərazilərin Rusiya ilə sərhəddi mövcud idi. Rusiyanın Qarabağla isə heç bir sərhəddi yoxdur. Hətta Ermənistanla da sərhəddi yoxdur. Kimsə düşünürsə ki, rus ordusu Qarabağdakı 40 min ermənini xilas etmək üçün bir dövlətin üzərindən keçib müharibəyə qoşulacaq, o başdan ayağa yanılır. Bunu Rusiya heç vaxt etməz».
Rusiyanın Ermənistandakı hərbi bazalarına gəldikdə isə Zərdüşt Əlizadə bildirib ki, onların vəzifəsi İrəvan ordusundakı generaliteti və Ermənistan hakimiyyətini siyasi cəhətdən nəzarət altında saxlamaqdır. «Orada cəmi 15 MiQ-29 qırıcı təyyarəsi və S-300 batareyası var. Onlara verilmiş tapşırıq nə Türkiyəyə, nə də Azərbaycana qarşı müharibə aparmaq deyil. Onların vəzifəsi Ermənistan ordusunu və onun üzərindən erməni siyasi elitasını nəzarət altında saxlamaqdır».
Xəbərdən istifadə edərkən istinad etmək vacibdir.
