Dünən İrəvanda erməni ordusunun kiçik serjantı Armen Ovannisyanın dəfn mərasimi olub.

 Virtualaz.org erməni mənbələrinə istinadən xəbər verir ki, Ermənistan Müdafiə Nazirliyi və hakimiyyəti kiçik serjantın dəfnini mümkün qədər təntənəli təşkil edib. Dəfn mərasiminə şəxsən müdafiə naziri Seyran Ohanyan və kiçik serjantın Azərbaycanın işğal edilmiş ərazilərində xidmət keçdiyi hərbi hissənin komandiri, deputatlar, vəzifəlilər qatılıblar.

 Xatırladaq ki, erməni tərəfi Ohanyanın yanvarın 20-nə keçən gecə “Azərbaycan ordusunun diversiya qrupunun həmləsini qəhrəmancasına dəf edərkən” öldüyünü elan edib. Azərbaycan Müdafiə Nazirliyi bu iddianı qəti təkzib edib.

 Dəfn mərasimində çıxış edən Seyran Ohanyan bir daha Ovannisyanın “qəhrəmanlığından” danışıb. O deyib ki, Azərbaycanın  “dişinə qədər silahlanmış” bir neçə diversiya qrupu Ovannisyanın olduğu mövqeyə hücum edib. Ancaq Ovannisyan və yoldaşları bu hücumu dəf ediblər.

 “Düşmən ciddi itki verib: bir neçə ölü, 25 yaralı” - deyən erməni nazir Azərbaycanı bir daha qisasla hədələyib.

 Qeyd edək ki, bundan əvvəl Ohanyan Ovannisyanın olduğu mövqeyə “30 nəfərlik diversiya qrupunun” hücum etdiyini, ancaq “adi döyüş hazırlığı keçmiş cəmi 9 erməni əsgərinin bu hücumu dəf etdiyini” demişdi.

Ancaq erməni nazir dəfn mərasimində necə kövrəlibsə, diversiya qruplarının sayını və “Azərbaycan tərəfinin verdiyi itkilərin” də sayını xeyli artırıb.

 Ohanyanın qəbiristanlıqdakı nitqindən belə başa düşmək olur ki, erməni mövqeyinə hücum edən 30 nəfərlik qrupdan salamat qalan olmayıb - onlar ya ölüb, ya da yaralanıblar. “Diversiya qrupu”undan bir nəfər də salamat qalmayıbsa, bəs onda yaralıları döyüş meydanından kim geri çıxarıb?

 Qəbiristanlıq mistik yerdir və orada  qarabasmalar ola bilər. Görünür, Seyran Ohanyan da qarabasmanın, üstəlik serjant Ovannisyanın ölümündən kövrəlmənin təsiri altında sayıqlamağa başlayıb. Əks halda onun bir-birini təkzib edən və heç bir normal məntiqə sığmayan nitqlərini necə izah etmək olar?

 Bir daha xatırladırıq ki, Azərbaycan Müdafiə Nazirliyi yanvarın 20-də təmas xəttində ordumuzun heç bir itki vermədiyini bildirir.