Ermənistan prezidenti Amerikada Rusiyadan gileyləndi
Cənubi Amerikada - Argentinada səfərdə olan Ermənistan prezidenti Serj Sərkisyan yerli “La Nacion” nəşrinə müsahibə verib. Musavat.com-un erməni informasiya qaynağına istinadən verdiyi məlumata görə, Sərkisyan müsahibədə Dağlıq Qarabağ ətraflındakı situasiyaya da toxunub, onu öz bildiyi kimi şərh edib.
Düşmən ölkənin başçısı ənənəvi şəkildə Azərbaycanı növbəti dəfə “aqressivlikdə” suçlayıb. Eyni zamanda yeni müharibə ehtimalından danışıb. “Biz yeni hərbi əməliyyatların mümkünlüyünü istisna eləmirik. Ancaq düşünürəm ki, belə hərəkətlər üçün Azərbaycanın imkanları yoxdur. Onlar həqiqətən hərbi-texnika, silah-sursat almağa çoxlu para sərf edirlər. Lakin bu, qələbəyə zəmanət vermir”, - deyə Sərkisyan özündənrazı şəkildə söyləyib.
İşğalçı dövlətin prezidenti strateji müttəfiqi Rusiyanın bostanına da daş atıb. Sitat: “Bizim xalqımız belə bir fakta çox üzülür ki, strateji müttəfiqimiz Azərbaycana silah satır. Ancaq mən Ermənistanın öz sərhədlərini qoruması üçün güc və bacarığının yetərli olduğuna əminəm. Baxmayaraq ki, Rusiya Bakıya silahlar və hərbi texnika satır, şübhə eləmirəm ki, bizim çətin dəqiqələrimizdə Moskva öz üzərinə götürdüyü öhdəlikləri yerinə yetirəcək”.
Musavat.com
Xəbərdən istifadə edərkən istinad etmək vacibdir.
