"Yandex” və "Uber” şirkətləri Rusiya, Azərbaycan, Ermənistan, Belarus, Gürcüstan və Qazaxıstanda onlayn-sifariş üzrə taksi xidmətlərinin birləşdirilməsinə dair müqavilə imzalayıb.
Xeberle.com Oxu.Az-a istinadən xəbər verir ki, "Yandex” və "Uber” birləşmə ilə bağlı birgə bəyanat yayıblar.
Bəyanatda deyilir ki, tərəfdaşlar yeni müştərək şirkət təsis edirlər. Bura gedişləri həyata keçirəcək müştərək şirkətə yeməklərin çatdırılması xidməti olan "UberEATS” də daxil olacaq.
"Uber” müştərək şirkətə 225 milyon dollar, "Yandex” 100 milyon dollar sərmayə yatırmağı planlaşdırır. Şirkətin ümumi dəyəri isə 3, 725 milyard dollar qiymətləndirilir.
Nəzərə çatdıraq ki, saziş artıq hər iki şirkətin direktorlar şuraları tərəfindən dəstəklənib.
Razılaşmanın 2017-ci ilin dördüncü rübündə tamamlanması gözlənilir. Həmin vaxta qədər şirkətlər adi qaydada fəaliyyətlərini davam etdirəcəklər.
Müştərək şirkətdə səhmlərin 59,3 faizi "Yandeks”ə, 36,6 faizi "Uber” şirkətinə, 4,1 faizi isə şirkətin əməkdaşlarına məxsus olacaq. Şirkətə isə "Yandeks Taksi” şirkətinin baş direktoru Tiqran Xudaverdyan rəhbərlik edəcək.
"Uber”dən verilən açıqlamaya görə, birləşmə qərarı taksi tariflərinə təsir etməyəcək.
Xəbərdən istifadə edərkən istinad etmək vacibdir.
