Bu sanksiyaların Rusiya üçün ciddi nəticələri olacaq.
Bunu politoloq Zərdüşt Əlizadə ABŞ Prezidenti Donald Trampın Rusiyaya qarşı yeni sanksiyalar haqqında qanun layihəsini təsdiq etməsinə münasibət bildirib.
Zərdüşt Əlizadənin sözlərinə görə, Rusiyanın buna qarşı atacağı addımlar çox cüzidir:
"Çünki Rusiyanın həm maddi, həm informasiya, həm də hərbi baxımdan imkanları çox məhduddur. Yəni Rusiyanın "yumşaq qüvvə” deyilən imkanları azdır. Rusiya yarımtəcrid vəziyyətindədir. Bəli, ətraf dövlətlərə əli çatır, bəzən kiməsə qapaz vurur, kimisə incidir. Lakin reallıqda Rusiya təcrid edilib. Rusiyaya qarşı yeni sanksiyaların əsas səbəbi təbii ki, bu ölkənin imperalist siyasəti, beynəlxalq hüququ kobud pozmasıdır. Rusiya Moldovanı, Gürcüstanı, Azərbaycanı əzəndə, separatçıları dəstəkləyəndə Qərb buna dözürdü. Çünki bu, Qərb üçün o qədər də əhəmiyyətli deyildi. Ancaq Rusiya Ukrayna məsələsində bütün beynəlxalq hüquqları pozanda, Qərbin iqtisadi və geosiyasi maraqlarına zərbə vuranda, Krımı tutanda, Luqansk və Donetskdə özünə bağlı separatçıların vasitəsilə dövlət yaradanda, bununlar Qərbin səbr kasasını doldurdu. Bu səbəbdən də yeni sanksiyalar meydana çıxdı və hesab edirəm ki, bu proses artan xətt üzrə inkişaf edəcək. Bu sanksiyalar asanlıqla ləğv edilməyəcək. Tarixi təcrübə göstərir ki, bu cəza tədbirlərinin ləğvi üçün Rusiya qoyulan tələblərə əməl etməlidir. Hazırda Rusiya mediası iddia edir ki, bu sanksiyaların ciddi nəticəsi olmayacaq, əksinə, Rusiya daha da güclənəcək və s. Ancaq bu bir təbliğatdır. Bəli, Rusiya bu sanksiyalar nəticəsində güclənə bilərdi. Əgər Rusiyada başqa bir hakimiyyət olsaydı. İndiki hakim komanda Rusiyanı gücləndirə bilməyəcək. Əksinə, Rusiya tədricən zəifləməkdə davam edəcək”.
Politoloq iddia edir ki, bu sanksiyaların tətbiqi ilə Qərb istədiyi məqsədlərə nail olacaq:
"Mən əminəm ki, Rusiya-Amerika münasibətləri daha da kəskinləşəcək. Qərb açıq bəyan edib ki, indiki vəziyyətin müsbət istiqamətdə dəyişməsi üçün Rusiya mütləq Krımdan əl çəkməli, Donetski və Luqanskı dəstəkləməməlidir. Hesab edirəm ki, Rusiya bunu etməyəcəksə, deməli, sanksiyaların davamı olacaq. Ehtimal edirəm ki, növbəti mərhələdə Moldova, Gürcüstan və Azərbaycan məsələsi də gündəmə gələcək, Qərb Rusiyadan növbəti güzəştləri tələb edəcək”.
Zərdüş Əlizadə qeyd edib ki, tətbiq edilən sanksiyalar Türk Axını layihəsini də təhlükə altına sala bilər:
"Ola bilsin ki, Rusiyanın bu layihəni başa çatdırmağa pulu çatacaq. Ancaq iş ondadır ki, dünya enerji bazarında vəziyyət tədricən dəyişir.
Birincisi, bərpa olunan enerji sahələri çox sürətlə inkişaf edir. Alternativ enerjinin müxtəlif dövlətlərdə payı artıb.
İkincisi, artıq ABŞ dünyada bir nömrəli qaz istehsalçısıdır. Üstəlik öz neftini də Avropa bazarına çıxarmağa çalışır. Bu da bir rəqabətdir. Bilirik ki, dünya siyasətinin mürəkkəb hadisələrindən biri də dünya bazalarına nəzarət uğrunda mübarizədir. ABŞ qazı, Qətər qazı və ərəb nefti sözsüz ki, Rusiyanı dünya enerji bazarından sıxışdırıb çıxarmağa başlayacaq. Bu da Rusiya üçün böyük təhlükədir. Çünki rusların yüksək elmi tutumlu sənaye sahələri çox azdır. Üstəlik müasir texnologiyaların Rusiyaya satılması da mümkün olmayacaq”.
Qeyd edək ki, ABŞ Prezidenti Donald Tramp Rusiyaya qarşı yeni sanksiyalar haqqında qanun layihəsini təsdiq edib. Sanksiyalar daha çox energetika, maliyyə, müasir texnologiya sahələri ilə bağlıdır.
Xəbərdən istifadə edərkən istinad etmək vacibdir.
