Cəbhə ilə bağlı hərbi sirr sayıla biləcək məlumatların yayılması cəmiyyətdə narahatlıq doğurur.

ANS TV-nin məluatına görə, dövlətin milli maraqlarına uyğun olmayan xəbərləri birinci Qarabağ müharibəsi zamanı efirdə, qəzetdə görməyən, şahidi olmayan döyüşçülər indi, torpaqlarının 20 faizi işğal olunduğu halda görəndə çox təəccüb edirlər. Məsələn, keçmiş döyüşçü, ehtiyatda olan polkovnik Məhərrəm Cahangirov deyir ki, 20 il Sovet ordusunda, 20 il də Azərbaycan ordusunda xidmət eləyib. Bu 40 ildə rastlaşmadığı halla indi qarşılaşır. Düşünür ki, müharibə şəraitində yaşayan ölkədə hərbi məlumatları öz təxəyyülünün məhsulu kimi tirajlamağa imkan vermək olmaz.

Məhərrəm Cahangirov deyir ki, "Çox şey məxfidir. Çox şey xidməti istifadə üçündür. Elə məlumatın heç xalqın bilməyinə də ehtiyac yoxdur. Əsgər ata-anaları rahat olmalıdırlar. Psixoloji durumu aradan qaldırmalıyıq”.

Əfqanıstan və Qarabağ döyüşlərinin iştirakçısı Tərlan Eyvazov yalnız düşmənin bəhrələnməsinə xidmət edən bu tip məlumatları yayanların hüquqi məsuliyyətini ən əsası hərbi sirrin qorunması ilə bağlı dərk etməyə çağırır. Müharibə şəratində yaşayan ölkənin KİV-i də, həvəskar çəkiliş aparan vətəndaşı da, bilərəkdən və ya bilməyərəkdən yaydığı infomasiyalara görə məsuliyyət daşıyır.

Tərlan Eyvazovun sözlərinə görə, "ANS ən qaynar nöqtələri işıqlandırırdı, bunun şahidi olmuşuq, amma biz onu ANS-də görmədik. O, hərbi məlumatlarımızı versin, texnikamızı silahı və s. bunun şahidi olmadıq”.

İyulun sonu, avqustun əvvəlində qoşunların təmas xəttində qısamüddətli müharibə zamanı bəzi kütləvi informasiya vasitələri cəbhədən yoxlanılmamış, rəsmi mənbəyi olmayan xəbərlər yaymışdı. Bu məlumatlar sırasında ordumuzun hərbi texnikasının hərəkət istqamətindən tutmuş, sayı, hətta nömrəsi belə açıq şəkildə nümayiş olunurdu.