Uzun müddətdən sonra Avropada separatizm meyilləri geniş vüsət almaqdadır və bunu separatizmin ikinci dalğası da adlandırmaq olar.
Bu sözləri Axar.az-a Avropanın qabaqcıl ölkələrində separatizmin geniş vüsət alması ilə bağlı danışan "Baku Network” Ekspert Şurasının rəhbəri, fəlsəfə doktoru Elxan Ələsgərov deyib. Qaçqın dalğasının Avropanı sarsıtdığını qeyd edən ekspert bildirib ki, o zaman Avropa Birliyində baş qaldıran ayrı-seçkilik insanlarda haqq-ədalətin olmaması düşüncələrini çoxdan formalaşdırmışdı:
"Fikir verin, Belçikada flamandlar və valonlar indiyə qədər hökumət qura bilməyiblər. Belçika mövcuddur, lakin hökuməti yoxdur. Bu ölkədə etnik qruplar bir-birilə heç cür uzlaşa bilmir. Eyni zamanda, Fransanın Korsika adası bu ölkənin qanununu tanımır. İtaliyada, İspaniyanın Bask vilayətində və Avropanın bir sıra qabaqcıl ölkələrində separtizm meyilləri olduqca güclüdür. Əlbəttə ki, bu problemin iqtisadi, siyasi və mədəni səbəbləri var. Vaxtilə Baskların əyalət hökuməti Dağlıq Qarabağı tanımaqla bağlı bəyanat verəndə İspaniya hökuməti heç bir reaksiya vermədi. Hesab edirəm ki, bu gün Kataloniyada baş verənlər məhz həmin prosesin təzahürləridir. Düzdür, Dağlıq Qarabağda separtizmin əsasını Ermənistan qoyub, ancaq Ermənistandan və xaricdən gələn qüvvələr bu məsələni daha da qızışdıraraq faktiki olaraq Dağlıq Qarabağı işğal etmişdilər. Yəni Kataloniyada belə hadisələr yoxdur, orada terrorizmlə mübarizə aparılmır. Kataloniyada yaşayan katalonlar ispan taleyinə qarşı qəddarlıq nümayiş etdirmirlər. Dağlıq Qarabağda isə separatizmin səbəbkarı xaricdən gələn terror təşkilatlarıdır. Əlbəttə ki, bu proses də dolayı olaraq Avropadakı separtizmə təsir etdi. Dağlıq Qarabağ probleminə qarşı bu cür ədalətsiz mövqe məhz Avropanın qabaqcıl ölkələrində özünün sərt üzünü göstərməkdədir. Bu, faktiki olaraq göstərir ki, separatizm bir-birinə bağlı və çox təhlükəli bir cərəyandır. İndi Avropada baş qaldıran separatizmin ikinci dalğası daha qanlı hadisələrə səbəb ola bilər”.
Xəbərdən istifadə edərkən istinad etmək vacibdir.
