Sumqayıtda yerləşən Qubadlı Rayon İcra Hakimiyyətinin iclas zalında Yeni Azərbaycan Partiyası Qubadlı rayon təşkilatının VIII hesabat konfransı keçirilib, eyni zamanda, YAP-ın yaranmasının 25 illiyi qeyd olunub.

Konfransda ötən müddət ərzində görülən işlər müzakirə edilib, təşkilati məsələlərə baxılıb. Konfrans iştirakçıları əvvəlcə ulu öndər Heydər Əliyevin büstü önünə gül dəstələri düzüblər. Dövlət himninin səsləndirilməsi ilə başlayan konfransda Yeni Azərbaycan Partiyasının banisi, ümummilli lideri Heydər Əliyevin xatirəsi bir dəqiqəlik sükutla yad olunub. Sonra partiyanın Qubadlı rayon təşkilatının sədri Allahverdi Haxverdiyevin hesabat məruzəsi dinlənilib. Məruzədə bildirilib ki, dahi şəxsiyyət Heydər Əliyevin ideyaları əsasında yaranan Yeni Azərbaycan Partiyası bu gün Prezident İlham Əliyevin sədrliyi ilə yeni inkişaf mərhələsinə qədəm qoyub və fəaliyyətini uğurla davam etdirir. YAP Qubadlı rayon təşkilatı fəaliyyətində partiyanın Nizamnamə və Proqram müddəalarının, YAP-ın qurultaylarının qərarlarının, icra katibliyinin tapşırıq və tövsiyələrini rəhbər tutur. Hazırda rayonda 80 ərazi ilk partiya təşkilatı və 3371 üzv var. Onlardan 1838-i qadındır. Üzvlərin 1326 nəfərini gənc təşkil edir. Rayon icra hakimiyyətinin başçısı Malik İsaqov çıxışında Yeni Azərbaycan Partiyasının ölkənin ictimai-siyasi həyatında oynadığı mühüm roldan söz açıb. Partiyanın idarə heyətinin üzvü, Milli Məclisin deputatı Eldar İbrahimov YAP Qubadlı rayon təşkilatının hesabat dövründəki fəaliyyətini qənaətbəxş hesab edib. Bildirib ki, tarixi zərurətdən yaranan partiya ötən illər ərzində xalqa xidmət missiyasını şərəflə yerinə yetirib. Çıxışlardan sonra təşkilati məsələlərə baxılıb. YAP Qubadlı rayon təşkilatının sədri, müavinləri, şura və idarə heyətinin üzvləri seçilib, nəzarət-təftiş qrupu formalaşdırılıb. Konfransda belə bir əminlik ifadə edilib ki, YAP Qubadlı rayon təşkilatının bütün üzvləri bundan sonra da ölkəmizdə gedən siyasi mübarizənin qabaqcıllarından olacaq, təşkilatın fəaliyyətini daha da möhkəmləndirəcək. Sonda rayonun ictimai-siyasi həyatında iştirak edən bir qrup YAP üzvünə fəxri fərman təqdim olunub, partiyanın sıralarına yeni qəbul olmuş şəxslərə isə üzvlük vəsiqələri təqdim edilib.

Sonda Prezident, Yeni Azərbaycan Partiyasının Sədri İlham Əliyevə müraciət qəbul olunub.(Azertac)