Türkiyə Prezidenti Rəcəb Tayyib Ərdoğanın Bakıya səfəri zamanı bir sıra ciddi məsələlər müzakirə olunacaq.
Bu sözləri Axar.az-a Türkiyə Prezidenti Rəcəb Tayyib Ərdoğanın Azərbaycana gözlənilən səfərini şərh edən keçmiş diplomat, politoloq Fikrət Sadıqov deyib.
Politoloq bildirib ki, yaranmış vəziyyət Bakı və Ankara arasında geniş dialoqu labüd edir:
"Türkiyə Prezidenti Rəcəb Tayyib Ərdoğanın Bakıya səfəri zamanı bir sıra ciddi məsələlər müzakirə olunacaq. Dünyada davam edən geosiyasi gərginlik, Cənubi Qafqazdakı mürəkkəb vəziyyət, o cümlədən Yaxın Şərqdə baş verən hadisələr gündəlikdə olacaq. Hesab edirəm ki, bir sıra məsələlərlə bağlı Azərbaycan və Türkiyənin mövqeləri üst-üstə düşəcək. Çünki Rusiya, Qərb və ABŞ-la münasibətlər koordinasiya olunmalı, fikirlər tənzimlənməli, bəlkə də mövqelərə yenidən baxılmalıdır”.
Politoloq görüşdə Dağlıq Qarabağ problemi və bu fonda iki ölkə arasındakı münasibətlərin əsas müzakirə predmeti olacağını qeyd edib:
"Bütün bu məsələlərin kompleks şəkildə müzakirəsi gözlənilir. Görüşün çox məhsuldar keçəcəyi və mühüm razılaşmlar imzalanacağı istisna deyil”.
Qeyd edək ki, Türkiyə Prezidenti Rəcəb Tayyib Ərdoğanın Azərbaycana səfəri oktyabrın 30-da baş tutacaq. Rəcəb Tayyib Ərdoğanın Bakıda keçiriləcək Bakı-Tiflis-Qars dəmiryolunun açılışında iştirakı da gözlənilir.
Xəbərdən istifadə edərkən istinad etmək vacibdir.
