Xəbər verdiyimiz kimi İraqın baş naziri Heydər İbadi Türkiyənin paytaxtı Ankaraya rəsmi səfər edib.

Məlumdur ki, onun səfəri İraq – kürd muxtariyyətinin lideri Məsud Bərzaninin mövqeyinin ciddi şəkildə zəiflədiyi bir vaxta təsadüf edir. Görəsən, bu görüşdən sonra Məsud Bərzaniyə qarşı, ümumiyyətlə bölgədə cərəyan edən hadisələrə qarşı rəsmi Bağdadla rəsmi Ankara ciddi şəkildə strateji müttəfiqlik qura biləcəkmi?Qura biləcəklərsə, bu müttəfiqlik nə zamana qədər davam edəcək?

Xeberle.com-a açıqlama verən politoloq Elxan Şahinoğlu hazırda bu ittifaqın zəruri olduğunu bildirib: "Əvvəllər Türkiyə prezidenti R.T.Ərdoğanla H. İbadinin münasibətləri gərgin idi. Hətta İbadi Türkiyədən ultimatumla tələb etmişdi ki, İraq ərazisindəki bəzi hərbçilərini çıxarsın. Halbuki həmin hərbçilər Beşika deyilən ərazidə terrorçulara qarşı savaşda iraqlılara hərbi təlimlər keçirdilər. Yəni bu, İraq hökuməti ilə Türkiyə hakimiyyətinin münasibətlərinin gərginliyindən xəbər verirdi. Lakin bunun tam əksinə Türkiyə hökuməti ilə Məsud Bərzani arasında çox sıx münasibətlər yaranmışdı. Bərzani bir qərarı ilə özünü çox pis vəziyyətə saldı. Referendum keçirməklə həm Türkiyə, həm İran, həm də mərkəzi hakimiyyətlə, Bağdadla münasibətləri gərginləşdirdi.

Hazırda Məsud Bərzaninin ətrafındakı qüvvələr deyirlər ki, gəlin yenidən danışıqlar aparaq, biz səhv etmişik və yenidən referenduma baxa bilərik. Amma mən hesab etmirəm ki, hazırkı vəziyyətdə rəsmi Bağdad bu danışıqlara hazır olsun. Çünki Kərkükə nəzarəti İraq ordusu həyata keçirəndən sonra İraq Mərkəzi Hökumətinin mövqeləri güclənib. Bu, Türkiyənin də xeyrinədir. Düşünürəm ki, bugünkü Ankara görüşündən sonra PKK-ya qarşı mübarizədə də Türkiyə ilə Mərkəzi İraq hakimiyyəti arasında əməkdaşlıq yarana bilər. Əgər İraq ordusu güclənibsə və İŞİD-dən bir-bir şəhərləri, sonrakı mərhələdə isə Kərkükü də azad edibsə, Türkiyənin bir istəyi də ola bilər ki, İraqın mərkəzi hökuməti tərəfindən ölkəyə tam nəzarət olunsun. Çünki Kandil dağları nəzarətdən azaddır və ora terrorçuların yuvasına çevrilib. Yəni prinsip ehtimalı ilə mümkündür ki, Kandildə bu iki dövlət birgə əməliyyat aparsın”.