Yaxın Şərqdə vəziyyət gərgin olaraq qalacaq.
Bu sözləri Axar.az-a açıqlamasında politoloq Tofiq Abbasov deyib. Ekspert Yaxın Şərqdə yeni müharibələrin qaçılmaz olduğunu bildirib:
"Çünki fövqəl-qüvvələr böyük xaosun yaradılmasını qarşılarına məqsəd qoyublar. Bu və digər məmləkətlərin parçalanmasına qərar vermiş qüvvələr hazırda özlərini məğlub olmuş saymasalar da, alternativ dağıdıcı gedişlər üzərində işləri davam etdirirlər. Bu baxımdan özlərini açıq şəkildə büruzə vermək istəməyən tərəflər kürd-ərəb, kürd-şiə, Kürdüstan-İraq, Suriya-kürd qarşıdurmalarına təkan verməyə çalışacaqlar. Türkiyə bölgənin gələcək arxitekturasının cızılmasında yaxından iştrak etməyə can atır. Bunun üçün Ankara ilk növbədə Dəməşq və Bağdadla dialoqa başlamalıdır. Hazırda qaynar məkanda söz sahibləri Moskva və Tehran, onlara bir qədər gec qatılmış Ankara olsa da, taktiki düyünlərin sayı xeylidir və onları cilovlamadan strateji məsələnin həllinə başlamaq qeyri-mümkündür. Söhbət sabitliyin təminatlı tərzdə bərqərar olmasından gedir”.
Politoloqun sözlərinə görə, təcrübə vəziyyəti pozmağın sabitliyi bərpa etməkdən daha asan olduğunu göstərir:
"Bunu gözəl anlayan üçüncü qüvvələr məhz bu metodologiyadan yararlanaraq hərəkət edirlər. Üçüncü Dünya müharibəsi rəsmən elan edilməsə də, o, artıq gedir. Bu savaşın ən qızğın meydanı isə Yaxın Şərqdir”.

Xəbərdən istifadə edərkən istinad etmək vacibdir.