Məlumdur ki, Amerika Birləşmiş Ştatları (ABŞ) Rusiyanın müdafiə sənayesinə qarşı sanksiyalar tətbiq etməyə hazırlışır. Bu da bir faktdır ki, ABŞ Rusiyaya qarşı artıq kifayət qədər iqtisadi sanksiyalar tətbiq edib və təbii ki, bu sanksiyalar öz effektini müəyyən qədər verib. Bəs görəsən müdafiə sənayesinə qarşı tətbiq olunacaq sanksiya ABŞ-Rusiya qarşıdurması üçün həlledici rol oynaya bilərmi?

Politoloq Fərhad Mehdiyev Xeberle.com-a açıqlamasında bildirib ki, bu sanksiyanın həlledici rol oynamayacaq: "Haqqında danışdığımız sanksiya ABŞ-Rusiya qarşıdurması üçün həlledici rol oynamasa da, Amerika tərəfi üçün əlavə divident qazandıracaq bir haldır. Əlbəttə ki, sənayedə barıt istehsalının qarşısını almaq mümkün deyil, amma müasir silahlarda elektronika istifadə edilir. Elektronikanın istifadəsində isə mikroçiplər və başqa qurğular geniş şəkildə tətbiq olunur. Həmin şirkətlərə o qurğuların satılması qadağan edilib. Məsələn, Koreya şirkəti yarımötürücü qurğuları Rusiyaya sata bilməyəcək, əgər satdığı müəyyən edilsə, ABŞ qanunvericiliyinə əsasən həmin şirkətə sanksiya tətbiq etmək mümkün olacaq. Bundan başqa Ermənistan dövləti də Rusiyanın hərbi sənayesi üçün əlavə avadanlıqlar istehsal edib göndərir. Belə baxanda həmin şirkətlər də o sanksiyaların təsiri altına düşməlidir”.

Qeyd edək ki, Amerikanın dövlət katibi Reks Tillersonun Rusiyanın sanksiya tətbiq ediləcək müəssisələrinin siyahısını hazırladığı da bildirilir.

Elnarə Salamova

Xeberle.com

Siyasət bölməsi

Xəbərdən istifadə edərkən istinad etmək vacibdir.