Siyasi ekspert Elxan Şahinoğlu  bildirdi ki, M.Saakaşvilini P.Poroşenko üzərində qalib hesab etmək olmaz: "Saakaşvili Gürcüstanda qoruyucu bir prezident idi. Orada rüşvətə qarşı çox güclü islahatlar apardı. Lakin çox təəssüflər olsun ki, Ukraynada dağıdıcı fəaliyyət göstərir. Keçmiş Odessa meri istəsə də, Ukraynada prezident seçilə bilməz. O, sözügedən ölkədə fəaliyyət göstərən müxalifət üçün işləyir. Belə baxanda onun Ukraynadakı reytinqi də aşağıdır. Onun bu mitinqlərdəki fəaliyyətindən daha çox Yuliya Timoşenko və P.Poroşenkonun əleyhinə olan oliqarxlar yararlanmağa çalışırlar. M.Saakaşviliyə yaşayış hüququnun verilməsi məsələnin bitdiyinin göstəricisi deyil. Mənə elə gəlir ki, P.Poroşenko bir müddət gürcü liderin bu fəaliyyətinə dözdükdən sonra, onun ölkədən çıxarılması üçün əlindən gələni edəcək. Əlbəttə ki, hazırda bu mümkün deyil. Saakaşvilinin davamlı şəkildə mitinqlər keçirməsində məqsədi odur ki, onu həbs edə bilməsinlər. Amma bu mitinqlərə son verilən kimi, onun başının üzərini qara buludların alacağını düşünürəm. Doğrudur, Ukraynanın Daxili işlər naziri Arsen Avakov da var ki, o da Saakaşvilinin əsas rəqiblərindən sayılır. A.Avakov prezidentin də gizli rəqiblərindən biridir, baxmayaraq ki, daxili işlər naziri vəzifəsində işləyir. M.Saakaşvilinin əslində iki hədəfi var, biri A.Avakovdursa, digəri P.Poroşenkodur. Lakin hazırda özünə daha çox P.Poroşenkonu rəqib hiss edir və onunla mübarizə aparmaq istəyir. Buna görə də Ukraynanın prezidenti məcburdur ki, M.Saakaşvilini siyasi həyatdan uzaqlaşdırsın. Fürsət düşən kimi, P.Poroşenkonun tərəfdarları əmr verəcəklər ki, M.Saakaşvilini ölkədən çıxarsınlar. M.Saakaşvilinin reytinqi aşağı olsa da, reytinqi yüksək olan müxalifətin fəallaşması üçün zəmin yaradır ki, bu da P.Poroşenkonun maraqlarına uyğun deyil”.

Politoloq Fərhad Mehdiyevin sözlərinə görə, artıq P.Poroşenkonun hakimiyyətinin zəiflədiyini demək mümkündür: "Ukraynalı bürokratlar arasında M.Saakaşvilini dəstəkləyən xeyli insan var. M.Saakaşviliyə həmçinin xaricdən də dəstək verilir. Bu məsələdə Qərb onu birmənalı olaraq dəstəkləyir. Ukraynalılara M.Saakaşvilinin Gürcüstan təcrübəsi məlumdur. Onlar bilirlər ki, o, hakimiyyətdən yapışaraq qanunsuz yol ilə onu saxlamağa meyilli bir siyasətçi deyil. Əgər bunu edən biri olsaydı, buna ilk növbədə öz ölkəsində cəhd edərdi. Çünki o, vaxtı ikən uduzduğunu görürdü, amma hakimiyyətdə qalmaq üçün qanunsuz heç bir yola əl atmadı. M.Saakaşvilinin heç bir ofşor zonada əmlakına da rast gəlinməyib. Əgər olsaydı, indiyə kimi mütləq bərqərar olardı. Buna görə də, Ukraynada ona müəyyən qədər etibar olunur. Düzdür, onu Qərbin agenti adlandıranlar da var. Lakin Ukrayna cəmiyyəti Qərb ilə inteqrasiyaya kifayət qədər açıqdır. Yəni M.Saakaşvilinin Qərb ilə münasibətlərinin olması onları qorxutmur və narahat etmir. Əlbəttə ki, onun P.Poroşenko üzərində qələbə qazandığını demək hələ tezdir. Bunu yalnız gələcəkdə baş verəcək hadisələr göstərə bilər. Əgər digər partiyalar da M.Saakaşvilinin ətrafında birləşsə və Ukrayna prezidentinə qarşı çıxsalar, onun Poroşenko üzərində zəfər qazanmaq ehtimalı yüksəkdir. Bu, digər siyasi qüvvələrin müttəfiqlik mövqeyindən asılıdır”.