"Həlli uzanmış Dağlıq Qarabağmünaqişəsinin nizamlanmasının yeganə yolu tərəflərin dürüst niyyətlə danışıqlar masasına qayıtmasından keçir".
Bunu ATƏT-in Baş katibi Tomas Qreminger "İnterfaks"a müsahibəsində deyib.
"ATƏT dialoq üçün platforma təmin edir və tərəfləri uzunmüddətli sülhə nail olmaq üçün dəstəkləyir. Bunun üçün isə tərəflərin əsl siyasi iradə göstərməsi lazımdır. Münaqişə tərəflərinin yalnız özləri sülh yolu ilə həllə nail ola bilər. ATƏT tərəfləri münaqişənin həllinə məcbur edə bilməz", - o bildirib.
O, bu baxımdan oktyabrın 16-da Vyanda ATƏT-in Minsk qrupunun həmsədrlərinin himayəsi altında baş tutan və bir ildən çox müddətdə bu səviyyədə ilk birbaşa görüş olan Azərbaycan və Ermənistan prezidentlərinin görüşünü alqışlayıb.
"Üç həmsədrin rəhbərliyi altında Minsk qrupu tərəflər üçün yeganə tanınmış formatdır. Bu formata ATƏT-in bütün üzv ölkələri tərəfindən tam etimad göstərilir", - T.Qreminger qeyd edib.(Report)

Xəbərdən istifadə edərkən istinad etmək vacibdir.