Məlum olduğu kimi, dünən BMT-nin Baş Assambleyası Qüdslə bağlı səsvermə keçirib. 128 ölkə Qüdsün İsrailin paytaxtı olmasının əleyhinə, 9 ölkə (cırtdan ölkələr) isə lehinə səs verib. Amerika Prezidenti Donald Tramp isə Qüdsü İsrailin paytaxtı kimi tanıdığını rəsmi şəkildə elan etmişdi.

 

Politoloq Zərdüşt Əlizadə bunun Amerikanın ilk məğlubiyyəti olmadığını bildirdi: "Bu ölkənin İsrail ilə bağlı siyasəti BMT-də dəfələrlə kəskin tənqid hədəfi olub. Hətta mən xatırlayıram ki, 80-ci illərdə Baş Assambleya sionizmi faşizmin bir növü kimi tanıdı, yəni bunun əleyhinə bir neçə dövlət səs vermişdi. Lakin sonralar Amerika çox güclü işlədi, bir ildən sonra bu məsələ yenidən səsverməyə qoyuldu və sözügedən qərar ləğv olundu. Bu onu göstərir ki, Amerika ondan asılı olan kiçik dövlətlərin, xüsusilə Asiya, Afrika, Latın Amerikası kimi kasıb dövlətlərin qolunu burub, onların qərarını dəyişməyə məcbur edə bilir. Fələstinlə bağlı onlarla qətnamə var ki, həmin qətnamələrdə Amerikanın Yaxın Şərqlə bağlı siyasəti tənqid edilir. Lakin bu, Amerikanın o qədər də vecinə deyil. Əgər real güc varsa, BMT qətnamələri icra olunur, güc yoxdursa, bizim Qarabağla bağlı 4 qətnaməmizdə olduğu kimi, havadan asılı qalır. Cənab Tramp elan elədi ki, Amerika əleyhinə səs verən dövlətlərə milyardlarla maddi yardım göndərib. Bununla da o, həmin dövlətlərin mövqelərini dəyişməyə vadar etdi. Bu günə qədər Amerika deyirdi ki, biz kasıb dünya ölkələrinə insanlıq, bəşərilik, humanizm xatirinə kömək edirik. Biz onlara yardım edirik ki, iqtisadi cəhətdən inkişaf etsinlər, acından ölməsinlər, demokratiyanın nə olduğunu öyrənsinlər, müstəqil düşünmək qabiliyyəti olan insanlara çevrilsinlər. Lakin məlum oldu ki, ABŞ həmin ölkələrə kömək edir ki, onlar qul kimi Amerikanın istənilən beynəlxalq-hüquqi qərarlarına dəstək versinlər. Əgər onlar dəstək verməzlərsə, Amerika bu maddi yardımları kəsəcək. Bu yardımlar onların iddia etdiyi kimi ülvi məqsədlərə deyil, çox alçaq məqsədlərə xidmət edir və formativ xarakter daşıyır”.