Türkiyənin etirazlarına baxmayaraq, məlum olduğu kimi, bir neçə gün öncə ABŞ Dövlət Departamentinin rəsmiləri Suriyada yerləşən terror təşkilatı PYD və PKK rəhbərləri ilə görüşlər keçirib. Görüş əsnasında terror rəsmiləri Amerikalı diplomatlara Suriyada federal sistemin qurulması ilə bağlı təklif irəli sürüblər. Əslində bu və bu kimi görüşlər belə bir qənaət yaradır ki, rəsmi Ankara nə qədər Vaşinqtona xəbərdarlıq etsə də, Amerika öz niyyətindən əl çəkməyəcək. Əksinə, nəyin bahasına olursa-olsun ABŞ Türkiyəni təzyiq və nəzarət altında saxlamaq üçün daim PKK və PYD kimi terrorçu qruplara öz dəstəyini verəcək. Görəsən, rəsmi Ankara Bərzani və Qüds məsələsində sərgilədiyi dik duruşu Suriyada federal sistemin qurulmamasında da sərgiləyə biləcəkmi?

Millət vəkili Fərəc Quliyev Xeberle.com-a açıqlamasında bildirib ki, bunu gələcək göstərəcək: "Fakt bundan ibarətdir ki, bu gün Türkiyənin vəziyyəti çox mürəkkəbdir. Onu müttəfiq kimi görənlərin də, düşmən kimi görənlərin də mövqeləri işə düşüb. Əslində Rusiya bu günləri Türkiyə ilə ittifaqdadır, amma o da PKK-ya qarşı yumşaq münasibət göstərir. Yaxud ABŞ və Qərb dövlətləri PYD-yə qarşı heç bir tədbir görmürlər. Bu günləri İŞİD məsələsi ilə bağlı olaraq başqalarını silahlandırırlar ki, guya İŞİD-ə qarşı döyüşürlər amma bunlara baxmayaraq yenə də PYD-yə və kürd silahlı qüvvələrinə silahlar verilir. Türkiyənin bugünkü vəziyyəti 100 il əvvəlki - məşhur Yaxın Şərq məsələsinə oxşayır. Orada Türkiyəni parçalamaq və onun yerində dövlətlər yaratmaqla başqa ölkələrin istismarına vermək nəzərdə tutulmuşdu və bu xüsusi neft amili ilə bağlı idi. Həmin layihə hələ də qüvvədədir. Onlar ən azından Türkiyəni zəiflədərək onu məcbur etmək istəyirlər ki, böyük Avrasiya layihəsində böyük güclərin istədikləri rolu oynasın. Türkiyə isə müstəqil davranış göstərdiyi üçün bu basqıların davam edəcəyini düşünürəm. Amma hesab eləmirəm ki, onlar Türkiyəni çökdürə bilsinlər, əks tədbirlər də yəqin ki, görüləcəkdir. Məncə, istər Amerika tərəfindən, istərsə də başqa dövlət tərəfindən PKK və PYD əllərdə maşa kimi istifadə olunacaqdır. Bu məsələnin köklü həlli yalnız Türkiyənin özündən və türk birliyindən aslıdır ki, bunu aradan qaldırsınlar. Yoxsa kənar qüvvələrin biz terrora qarşı birgə mübarizə aparırıq, terror ümumbəşəri bəladır deyib, ardınca da terroristlərə yaxşı, pis terrorist təsnifatı verirlərsə, bu, Türkiyənin zərərinədir". F.Quliyev əlavə olaraq onu da qeyd etdi ki, bu ağırlıq bir müddət davam edəcək. Amma Türkiyə paralel olaraq müttəfiqlərini artırsa və iri güclərini birləşdirsə, sözügedən proseslərin qarşısında dayanmaq imkanına malik olacaq".