NATO baş katibi Stoltenberq Nüvə silahının yayılmaması müqaviləsinə təşkilat adından etiraz bildirib. O qeyd edib ki, Çin, Rusiya, Şimali Koreya ölkələrində nüvə silahı varkən NATO-nun bu müqaviləyə tərəfdar çıxması mümkün deyil.
Politoloq Nəzakət Məmmədova məsələ ilə bağlı olaraq bildirib ki, Stoltenberqin dedikləri nüvə silahının yayılmaması baxımından ona görə əhəmiyyətlidir ki, nüvə silahı qlobal güclər arasında müharibənin qarşısını alan çəkindirici silahlardan biridir.
"Dünyada adi silahlarla müharibə daima baş verir nüvə silahı isə yalnız təhdidedici, amma tətbiqi real olmayan silah növüdür. Əksinə, Soyuq müharibə dövründə məhz nüvə silahının olması ABŞ və SSRİ-ni bir-biri ilə müharibə etməkdən çəkindirmişdir. İki fövqəldövlət rusların Karib böhranı, amerikalıların isə raket böhranı dedikləri 1961-ci il Kuba ətrafında nüvə müharibəsinin astanasından geri dönmüşdü. Eyni zamanda, Türkiyə də NATO üzvü kimi təşkilatın nüvə çətiri altında qorunur və Rusiyanın nüvə dövləti, İranın nüvə silahı əldə etməyə çalışdığı bir şəraitdə bu, Türkiyə üçün çox vacibdir. İsrailin də nüvə silahına malik olması nəzərə alınarsa, Türkiyə üçün bunun əhəmiyyəti daha aydın görünər. Bir neçə il əvvəl alman kəşfiyyatı Türkiyənin nüvə silahı əldə etmək qabiliyyətində olduğunu xəbər vermişdi".
N.Məmmədova əlavə olaraq qeyd edib ki, əgər bu baş verərsə Türkiyə Pakistandan sonra ikinci müsəlman nüvə dövləti ola bilər. Türkiyə NATO əlaqələrinin perspektivi həm də Türkiyənin etibarlı nüvə çətiri məsələsinin necə həll olması ilə bağlıdır.
Hicranə İsmayılova
Xeberle.com
Siyasət bölməsi
Xəbərdən istifadə edərkən istinad etmək vacibdir.
