Azərbaycanın ən yaşlı seçicisinin adı məlum olub. Ölkənin ən yaşlı seçicisi Bərdə rayon sakini 1894-cü il təvəllüdlü Allahverdiyeva Səmərqədir. Onun 124 yaşı var. Görəsən Sumqayıtın ən yaşlı seçicisi kimdir? Elə bu məqsədlə Xeberle.com olaraq şəhər ərazisində fəaliyyət göstərən seçki dairələri ilə əlaqə saxladıq. Məlum oldu ki, 41 saylı Sumqayıt I seçki dairəsində yaşı 80-100 olan seçicilərin sayı 532 nəfər təşkil edir. 42 saylı Sumqayıt II seçki dairəsində ən yaşlı seçici Hacıyeva Pərişan Əlif qızıdır. O, 104 yaşındadır. 43 saylı Sumqayıt III seçki dairəsində isə ən yaşlı seçicilərin 96 yaşı var. Onlar Mirzəyev Talış Qasım oğlu və Məmmədova Bulqeys Murad qızıdır. 44 saylı Sumqayıt-Xızı seçki dairəsində ən yaşlı seçicilərə gəldikdə isə, bunlar 100 yaşında olan Ağayev İsaqulu Baxşalı oğlu və 101 yaşlı Süleymanova Gülgəz Əli qızıdır. Aparılan kiçik araşdırmadan sonra məlum oldu ki, Sumqayıtın ən yaşlı seçicisi 104 yaşında olan Hacıyeva Pərişan Əlif qızıdır.