Türkiyədə prezident seçkiləri yaxınlaşdıqca namizədlər arasında gərginlik artır. Namizədlər təbliğat çıxışlarında bir-birilərini sərt şəkildə ittiham edir və dövlətə qarşı çıxmaqda günahlandırırlar. Bu məqamda Cümhuriyyət Xalq Partiyasının (CHP) prezidentliyə namizədi Muharrəm İncə və Ədalət və İnkişaf partiyasının namizədi, hazırki prezident Rəcəb Tayyib Ərdoğan arasında olan münasibətlər kuliminasiya nöqtəsinə çatıb.

 

Xeberle.com-un Türkiyə mətbuatına istinadən verdiyi məlumata görə, CHP-nin prezidentliyə namizədi Muharrəm İncə hazırki prezident Rəcəb Tayib Ərdoğanı məhkəməyə verib. Muharrəm İncənin vəkili Mustafa Kamal Çiçək mətbuata açıqlamasında atdıqları addımı belə izah edib:

 

"Ərdoğan iyunun 8-də Kayseridə keçirilən təbliğat mitinqində Müarrem İncəni açıq şəkildə təhqir edib. O, İncəyə: "Muharrəm bəy, sən bu seçimlərdən birinci çıxa bilməsən, bu işi tərk etməyə hazırmısan? Baxaq, görək…Sən tərk etməzsən. Siz əmri eyni yerdən alırsınız, Pensilvaniyadan…” şəklində ağır ittihamlar edib. Ölkəmizdə 15 iyun və sonrası baş verən proseslərdən sonra "Pensilvaniyadan əmr alırsınız” ifadəsi dünyadakı bütün məhkəmə sistemlərində haqsızlıq kimi qəbul ediləcək." M.İncə hesab edir ki, R.T.Ərdoğan ona böhtan atıb və eyni zamanda təhqir edib. Məhz bu səbəbdən prezidentliyə namizəd məhkəməyə müraciət edərək qarşı tərəfə 100 min lirəlik təzminat davası açıb.