Tədbirdə ictimaiyyət nümayəndələri, Elçibəyin yaxın silahdaşları, deputatlar, hüquq müdafiəçiləri və digər ictimai xadimlər iştirak ediblər.

Azərbaycan Respublikasının Dövlət Himni səsləndirildikdən sonra şəhidlərin əziz xatirəsi bir dəqiqəlik sükutla yad edilib.

Tədbirdə çıxış edənlər Əbülfəz Elçibəyin siyasi fəaliyyəti barədə, milli azadlıq uğrunda apardığı mübarizədən söz açıb, Elçibəylə bağlı xatirələrini bölüşdülər.

Tədbirin gedişinldə "İstiqlal, Hürriyyət, Bütövlük Strategiyası" kitabının təqdimatı olub.

Daha sonra "Elçibəy-80" yazı müsabiqəsinin qalibləri mükafatlandırılıblar. "Əbülfəz Elçibəy-80" İctimai Təşkilat Komitəsinini məlumatına görə, müsabiqəyə Türkiyədən və Özbəkistandan da qatılanlar olub.

44 yazının təqdim olunduğu müsabiqədə birinci yeri Ləman Ələşrəfqızı, ikinci yeri Jalə Mütəllimova, üçüncü yeri isə Səbuhi Məmmədli tutub. 10 nəfərə isə həvəsləndirici mükafat verilib. Türkiyədən müsabiqəyə yazı təqdim edən Cəmil İpək və Beytulla Avcı həvəsləndirici mükafata, Özbəkistandan müsabiqəyə şeir göndərən iştirakçı isə diploma layiq görülüblər.

Qeyd edək ki, mükafatlandırma zamanı müəyyən qalmaqal yaşanıb. Belə ki, yazısına görə 4-cü yerə layiq görülən gənc yazar Kəramət Böyükçöl, mükafatdan imtina edib.

Yazısının birinci yerə layiq olduğunu iddia edən K.Böyükçöl "Mən bundan öncə Elçibəylə bağlı status yazmışdım və o status yanlış anlaşılmışdı. İndi də mənə yazıma görə yox, statusuma görə yer veriblər. Mən bu mükafatdan imtina edirəm. Çünki qiymətləndirmə ədalətsiz olub", - deyə söyləyib.

Mükafatı təqdim edən jurnalist, yazı müsabiqəsinin münsiflər heyətinin üzvü Əvəz Zeynallı isə Kəramət Böyükçölün fikirlərinə hörmət etdiyini, lakin qiymətləndirmənin ədalətsiz olması iddiası ilə razılaşmadığını bildirib.

Tədbirdə həmçinin Sabir Rüstəmxanlı, İsa Qəmbər, İsgəndər Həmidov, Rüstəm Behrudi, Pənah Hüseyn və digər çıxışçılar Ə.Elçibəyin həyat və fəaliyyətindən, xatirələrindən danışıblar.

Məlumat üçün qeyd edək ki, "Elçibəy-80" yazı müsabiqəsinin münsiflər heyətininin üzvləri Ədalət Tahirzadə, Sabir Rüstəmxanlı, Ramiz Rövşən, Rüstəm Behrudi, Mehriban Vəzir, Qulu Məhərrəmli, Rauf Arifoğlu, Mehman Əliyev, Əvəz Zeynallı, Cavid İsmayıl və Çingiz Özgür idi.

Sevinc Məhərrəmqızı