Ermənistanın baş naziri Nikol Paşinyan oğlu Aşot Paşinyanı hərbi xidmət keçmək üçün Qarabağa yollayıb. Ordudakı özbaşınalığın qarşısını almaq və orduda xidmət etmək istəməyən gəncləri əsgəri cəlb etmək üçün belə bir addım atan Paşinyanın nə etmək istədiyi hamıya məlumdur. 

 

Xeberle.com məlumat verir ki,Moderator.az-a açıqlamasında keçmiş korpus komandiri, tanınmış hərbi ekspert, ehtiyatda olan polkovnik Şair Ramaldanov bildirdi ki, bu, işğalçı ölkənin qiyamçı baş nazirinin daxili auditoriyaya hesablanmış hiyləgər gedişidir və onun səmimiliyinə kimsə inanan deyil:

"Paşinyan hakimiyyətə də populist əməlləri ilə gəlib və bu da onun dəsti-xəttidi. İndi də bu saat Qarabağ məsələsiylə bağlı Paşinyan sərt ifadələri ilə də gündəmə gəlir. Təbii ki, cəmiyyət ondan Qarabağ məsələsində müəyyən bir dəyişiklik də gözləyirdi, amma bu ümidləri o, doğrultmadı. Cəbhə bölgəsində nizam-intizamsızlıqla bağlı itkilərin sayı da artdı. Dağlıq Qarabağın özündə müəyyən mitinqlər başladı. Bu addımlar hamısı bu gün Paşinyanın hakimiyyətdə olduğu dövrdə onun durumunu ağırlaşdıran amillərdən biridir və bu da onu göstərir ki, gərginlik Ermənistanda bundan sonra da davam edəcək. Mən demək istəyirəm ki, erməni valideynlər öz övladlarının Dağlıq Qarabağda xidmət etməsini istəmirlər. Ermənistanda indiyə kimi bunun üçün cürbəcür yollara əl atdılar, amma alınmadı. İnsanların daxilində bir psixoloji durum var: var haqq addım, bir də var nahaq addım. İşğalçının əməyi heç vaxt haqq addım kimi qəbul olunmur. Ona görə də təbii ki, Dağlıq Qarabağda xidmət edən erməni əsgərləri bilirlər ki, onlar işğalçı dövlətdin tərkibində xidmət edirlər və o torpaqlar heç vaxt Ermənistanın olmayacaq. Onlar xidməti dövründə həmişə qorxu içində yaşayırlar ki, Azərbaycan hər an hücuma keçərək öz torpaqlarını işğaldan azad edəcək. Bunun üçün Azərbaycan parad keçirdi. Ölkə başçısı Qarabağla bağlı qəti mövqeyini bildirdi”. 

Ş.Ramaldanov deyib ki, Aşot Paşinyanın hansı şəraitdə xidmət edəcəyi hamıya məlumdur:

"İndi də xidmət etmək istəməyən əsgərləri orduya cəlb etmək üçün Paşinyan öz oğlunu ortaya atıb ki, guya mənim oğlum da xidmət edir, siz oğlumdan artıq deyilsiniz. Bu populist bir addımdır. Hamı bilir ki, Aşot Paşinyan hansı şəraitdə xidmət edəcək. Oğlunun üstündə komandirlər əsəcəklər, ona xüsusi bir şərait yaradacaqlar. Yəni elə düşünün ki, bir "avtoritet” türməyə gedir və orda ona necə bir şərait yaradırlar. Aşot Paşinyanın Dağlıq Qarabağda olduğunu göstərdikdən sonra kim bilir o, hara aparılacaq. Bunu kimdi ki, kontrolda saxlayan. Mən düşünürəm ki, Paşinyan cəmiyyəti xilas etmək üçün başqa addım atmalıdır. Təbii ki, Azərbaycan ordusu torpaqları işğaldan azad edərkən Aşot Paşinyan orda olsa, (inanmıram ki, orda olsun) onda o, müəyyən bir hisslər keçirəcək”.