"ABŞ analitikinin fikri ilə razılaşmaq olar. Əlbəttə ki, Ermənistanın son addımlarına baxdıqda bu, daha çox inandırıcı görünür. Paşinyanın istər daxili siyasəti, istər Qarabağ məsələsində tutduğu mövqe Rusiyanın Ermənistandan və Qarabağ məsələsində iştirakdan uzaqlaşdırılmağa yönəldilib”.

Bu sözləri Xeberle.com-a açıqlamasına politoloq Nəzakət Məmmədova fransalı şərhçi Olivye Morelin çıxışına münasibət bildirərkən qeyd edib.

Politoloq Ermənistan hakimiyyətinin müstəqil şəkildə qərar vermək iqtitarında olmadığını qeyd edib: "ABŞ-ın Rusiyanı regiondan sıxışdırıb çıxarmaq və İrana qarşı koalisiya yaratmaq istəməsi təbiidir. Çünki bu ölkələr geosiyasi rəqiblərdir. Ermənistan rəhbərliyi də bu cür sövdələşməyə gedə bilər. Çünki Paşinyanın onu hakimiyyətə gətirən dairələrin sözündən çıxa biləcəyi inandırıcı deyil. Lakin Azərbaycanın bu koalisiyaya qoşulması da inandırıcı deyil. Əvvəla, Azərbaycan müstəqil ölkədir, onun hakimiyyətini kimsə nəyəsə məcbur edə bilməz. Digər tərəfdən Azərbaycan Ermənistanla belə bir koalisiyaya heç zaman getməz. Üstəlik də, Azərbaycan prezidenti hər zaman bəyan edib ki, ölkəmiz İrana qarşı heç bir ölkənin bizim ərazimizdən istifadə etməklə hər hansı fəaliyyətinə icazə verə bilməz. Hər zaman da Azərbaycan sözünün üstündə durub, vədinə əməl edib. Baxmayaraq ki, İran heç də həmişə bizə qarşı layiqli şəkildə davranmayıb və son Gəncə olayları da bunu sübut etdi.

 

Odur ki, İrana və ya Rusiyaya qarşı ABŞ hər hansı koalisiya formalaşdırsa, orada Azərbaycanın iştirakı istisna olunmalıdır. Azərbaycan heç zaman belə bir addım atmaz, necə ki, indiyədək bunu etməyib. Azərbaycanın rəhbərliyi verdiyi vədə sona qədər sadiq qalmaq iradəsinə və əzminə malikdir. ABŞ belə bir koalisiyanı Ermənistanla qura bilər, bəlkə də artıq qurub. Ermənistanın Qarabağ danışıqlarını yeni formata keçirmək istəyi, növbədənkənar parlament seçkiləri keçirmək planları Rusiyanı proseslərdən uzaqlaşdırmaq istəyindən xəbər verir. Eyni zamanda, İran səfirinin Ermənistan müdafiə naziri ilə Brüssel səfəri ərəfəsində görüşü də Tehranın Ermənistanın ona qarşı xəyanətindən narahat olması deməkdir. Görünür, Ermənistan artıq bu fəaliyyətlərə başlayıb. Lakin Azərbaycan qonşu ölkələrlə dinc yanaşı yaşamaq prinsipləri əsasında öz xarici siyasətini qurub və bütün müqavilə öhdəliklərinə sadiqdir”. Qeyd edək ki, fransalı şərhçi Olivye Morel öz çıxışı zamanı bildirib ki, ABŞ Cənubi Qafqazda Azərbaycan və Ermənistanı barışdırıb İrana qarşı böyük koalisiya yaratmaq istəyir və Ermənistanın yeni baş naziri Nikol Paşinyan Vaşinqtondan dəstək almaq üçün bu ssenari ilə razılaşmağa hazırdır. O həmçinin bildirib ki, ABŞ Qarabağ münaqişəsinin nizama salınmasında Rusiyanın aparıcı vasitəçi olmasını da sıradan çıxarmaq və özünün əsas təşəbbüskar kimi çıxış etməsini təmin etmək istəyir.