Ermənistanın "İravunk” nəşri xüsusi təyinatlı kəşfiyyat və sabotaj dəstəsinin baş komandiri, kəşfiyyatçı Vova Vartanovla müsahibəni yayımlayıb. Müsahibədə Vartanov Azərbaycan ordusunun Naxçıvandakı neytral ərazidəki irəliləyişindən narahatlığını bildirib.
Müsahibədə Azərbaycan hərbi birləşmələrinin Naxçıvan istiqamətində irəliləyişinin Ermənistanda gizlədildiyi və erməni ictimaiyyətinin diqqətinin Ermənistan xüsusi xidmət rəhbərlərinin gizli audio-yazısına yönəldildiyi bildirilib.
Oxu: Ermənistan xüsusi xidmət rəhbərlərinin gizli söhbəti yayıldı – AUDİO
Müsahibədəki Naxçıvan əməliyyatları ilə bağlı hissəni ixtisarsız təqdim edirik:
- Cənab Vartanov, Müdafiə Nazirliyinin ekspertləri bu informasiyanı təkzib etməsinə və narahatçılığa heç bir əsasın olmamasını açıqlamasına baxmayaraq, ictimaiyyət üçün Naxçıvanla sərhəddəki vəziyyət hələ də qaranlıq qalıb. Düşmən tərəfinin həmin istiqamətdə irəliləyişi olub və heç bir ciddi erməni ekspert bunu təkzib etməyib.
- Bax, buna görə də məni iclasa çağırmamışdılar və bilirdilər ki, mən olanı deyəcəyəm. Bəli, vəziyyət narahatedicidir və 100 faizlik narahatlığa əsas var, təşvişə isə yalnız axmaqlar düşə bilər. Əgər normal insanlarıqsa, ağlımız başımızdadırsa, gərgin işlərə başlamalıyıq, çünki bəzi məsələlər üzərində işləmək lazımdır. Onların mövqelərini yaxşılaşdırması və irəliləməsi narahatlıq doğurmur? Əgər əvvəllər biz türkləri binokldan görürdüksə, indi bir-birimizə sapandla da atəş aça bilərik.
Eyni zamanda, onlar Yerevan-Mehri magistralına nəzarəti ələ ala biliblər və pilotsuz uçuş aparatlarını havaya qaldırmadan istənilən anda artilleriyalarını bu istiqamətə yönəldə bilərlər. Nəticədə, bu magistralla hərəkət edəcək qoşun, silah və sursatımız atəş altında qala bilər. Bu, narahatlıq törətmir?
- Azərbaycan ordusunun irəliləyişi ilə nə qədər ərazi Azərbaycanın nəzarətinə keçib?
- Areni kəndində... necə deyim ki, təşviş yaratmayım? Burada narahatlığa əsas yoxdur. Arada bir-birimizi öldürürük: gah onlar bizim uşaqlardan kimisə öldürür, gah biz onların əsgərlərini öldürürük. Əgər gələcəkdə genişmiqyaslı hərbi əməliyyatlar başlasa və düşmən Zəngəzur, Vayk, Artsaxa (Qarabağ - red.) gedən əsas və yeganə yolumuza atəş açsa, necə narahat olmayasan?
- İndiyədək deyilir ki, sabiq hakimiyyət səbəbindən 800 hektar ərazidə nəzarəti itirmişik. Ola bilsin ki, bir müddət sonra Naxçıvan istiqamətdə də bir neçə yüz hektar ərazini itirdiyimiz məlum olacaq, niyə susaq?
- 800 hektar ərazini itirdiyimiz vaxtda demişdim: bu, yanlış yanaşmadır. Türklər həmin vaxt 800 hektar deyil, 20-30 hektar ərazini ələ keçirib, ancaq 800 hektar ərazi onların nəzarəti altındadır.
Oxu: Hərbi ekspert: Laçın yoluna nəzarət işğaldan qurtulmaq üçün addımdır
Yəni onlar oturduqları ərazini götürüblər. Burada isə mənzərə fərqlidir və söhbət hektarlardan getmir. Düşmən bizim əsas magistralımıza nəzarət edir. Əgər sən Yerasxavansk ərazisindəsənsə, torpağı 2-3 metr qaldırmaqla düşmənin görüntüsünün qarşısı ala bilərsən, ancaq bu ərazidə bunu etmək üçün onlarla və hətta yüzlərlə metrlik divar qaldırmalısan. Bu isə mümkünsüzdür. Elə çıxır ki, sən yollar axtarmalısan: ya bu ərazidən ötməlisən, ya da düşmən bu ərazini istənilən halda məhv edəcək.
- Vaxtilə elə gəlirdi ki, Naxçıvanla sərhəddə ən əlverişli mövqelər bizim əlimizdədir, ancaq başqa mənzərə ilə qarşılaşırıq. Bu, kimin səhvi idi?
- Birmənalı şəkildə Müdafiə Nazirliyinin... Bütün məsuliyyət bu işin etibar edildiyi şəxsin üzərinə düşür. Müdafiə Nazirliyi hansısa səbəblərdən türklərin tikinti işlərinə və səngərlərin hazırlanmasına passiv yanaşıb. 2016-cı ildən MN çox diqqət yetirirdi, ancaq bu dəfə diqqətsiz oldular. Bu suala cavabı özünüz axtarın.
(oxu.az)
Xəbərdən istifadə edərkən istinad etmək vacibdir.
