Daxili İşlər Nazirliyi (DİN) AXCP funksionerlərinin partiyanın üzvü Baba Süleymanovla bağlı sosial şəbəkələrdə yaydıqları məlumatlara münasibət bildirib.
DİN-in Mətbuat Xidmətindən Xeberle.com-a verilən məlumata görə, Baba Süleymanovun qanunsuz həbs olunması barədə səslənən iddialar tamamilə əsassızdır və qərəzdən irəli gələn dezinformasiyadır.
"Bakı şəhər sakini Süleymanov Baba tətbiq edilmiş xüsusi karantin rejimini pozduğu üçün saxlanılıb, barəsində toplanmış materiallarla birlikdə məhkəməyə təqdim olunub və məhkəmənin hökmü ilə inzibati qaydada həbs olunub. Yeri gəlmişkən qeyd edək ki, xüsusi karantin rejimini pozduqlarına görə təkcə mart ayı ərzində 160 nəfərdən çox şəxs inzibati qaydada həbs edilib.
AXCP üzvünün qanunsuz həbs edilməsi iddiasına gəldikdə isə qeyd olunmalıdır ki, əqidəsindən, siyasi partiyalara, ictimai birliklərə mənsubiyyətindən asılı olmayaraq cinayət, yaxud inzibati xəta törətmiş istənilən şəxs qanun qarşısında bərabədir və yol verdiyi hüquqazidd əmələ görə də cavabdehlik daşıyır", - deyə məlumatda qeyd olunub.
Xəbərdən istifadə edərkən istinad etmək vacibdir.
